E directora di e certamen Mexicana Universal a graba un video den cual e ta bisa di ta arepenti di a ofende Sofía Aragón. Despues di su declaracionnan controversial contra di e ex-reina di beyesa, Sofía Aragón, Lupita Jones a comparti un video den cual e ta disculpa pa a ofende Sofía y otro ex-participantenan di e concurso. Sofía Aragón a sigura cu durante su preparacion pa e concurso di Miss Universo, e no a ricibi apoyo di Lupita, ken a defende su mes argumentando cu el a paga algun cirugia estetico di e modelo. Sofía a acusa Lupita di violencia simbolico despues cu algun video cu a filtra di e ex-reina di beyesa papiando malo di dje.
Lupita Jones den e video a bisa cu algun dia pasa, el a protagonisa un di su pio aparicionnan publico, el a mustra manera un muhe agresivo, violento, vengativo, sin compasion y cu falta di ‘sororidad’. El a desconoce su mes y ta ofrece su disculpa. E ta lamenta profundamente su comportacion y e palabranan cu a sali for di su boca. E ta ofrece un disculpa sincero na Sofía Aragón pa e manera con el a expresa di dje; “Niun muhe merece pa trat’e asina, menos ora e muhe ey a representa tur e mexicanonan cu preparacion, inteligencia, elocuencia y beyesa”, tabata palabranan di Lupita Jones.
Den e video, Lupita a afirma cu e polemica algun dia pasa por ta door di un mal comprondemento, pues ta afirma cu durante añanan el a keda keto ‘penosas’ pa cuida e imagen di e participantenan. E directora di e certamen Mexicana Universal a reconoce cu el a papia yen di rabia, e ta lamenta cu el a wordo lastra door di su rabia y a ripiti su disculpa. Henter e polemica aki start ora den un transmision live riba Instagram, Sofía Aragón, a relata cu Lupita a bise cu no tin placa p’e y cu e por haci loke cu e kier. P’esey el a gasta tur su placa gespaar pa continua cu su preparacion, ta na e punto cu e no tabatin nada pa come. E ta sufri di ‘endometriosis’, un problema ginecologico, y e mester a bay su citanan constantemente. Durante tur su preparacion e no por a bay ni un solo biaha. E tabata bisa Lupita: “por favor necesito ir al doctor”, y e tabata contesta: “sorry no hay”.
Despues e modelo Denisse Franco, ken a gana Nuestra Belleza México 2017, a bira solidario cu Sofía y a bisa cu durante su participacion, Jones no a sostene economicamente, y a lage abandona algun siman prome di presenta den e concurso di Miss Universo 2017 na Las Vegas. Despues di scucha e declaracionnan, Lupita Jones a kibra e silencio y el a defende su mes di e acusacionnan cu el a haya di e ex-reinanan di beyesa, y a atraves di un video cu el a publica riba su rednan social, el a desminti loke Sofía a bisa, y el a sigura cu no solamente el a apoya e modelo di 26 aña, pero cu el a paga e areglonan estetico cu Aragón a haci pa participa den e certamen di beyesa.
Lupita Jones ademas a conta cu el a pone na disposicion di Sofía un ekipo di profesional pa yude supera tur su traumanan, cu e tabata un muhe insigur cu ademas tabata sufri di depresion: “Mi sa di unda Sofía Aragón ta bin, mi sa ken e ta. Mi sa di e traumanan, e insiguridad cu el a yega cu ne. Sofía tabata yega rancando su venanan, sin baña oficina, den depresion total pa tur loke nan tabata bise di dje riba e rednan social”, Lupita a bisa. Ademas, e ganadora di Miss Universo 1991 a manda un mensahe contundente na e ex-reinanan di beyesa. “Mi por conta e parti di tur e otronan, pasobra mi sa di unda tur ta bin y di cua pia nan ta coho, desde e drogadicto y e alcoholico”, Lupita Jones a sigura prome cu el a pidi un disculpa publico.
