Un espacio elegante no semper mester di cambionan grandi. Hopi biaha, ta e detayenan chikito di diseño ta haci un interior mustra moderno, limpi y sofistica. Rayson y Dalia Semeleer di Dalia Design Studio ta ilustra y splica den Focus Digital Magazine di e luna aki, cual ta e tres elementonan clave cu por transforma e apariencia di cualkier espacio.
1. Plafond: Menos ta Mas
2. Mueble di TV: E Proporcion ta Importante
3. Cusinchinan: Volumen y Proporcion
1. Plafond demasiado elabora cu diferente nivel, curva y forma por haci un espacio mustra sobrecarga. Awendia, e tendencia ta mustra na e plafondnan mas limpi, plat y minimalista, caminda e iluminacion ta bira un parti integral di e diseño.
2. Un mueble di television demasiado chikito pa e muraya of e tamaño di e television por haci cu e espacio ta mustra informal y poco sofistica. Minimalista no ta nifica chikito; e ta nifica haya e proporcion adecuado.
3. E cusinchinan por cambia completamente e apariencia di un sofa. Pa logra un composicion elegante, nos por hunga cu diferente tamaño, por ehempel 24, 22 y 20 inch. E combinacion di tamaño ta crea profundidad y ta evita cu tur ta parce mescos, pero tin un otro detaye crucial: e reyeno di e cusinchinanan.
Den cada un di e elementonan clave menciona ta splica dicon menos elemento, mas intencion. Diseño sofistica no semper ta consisti di agrega mas. Hopi biaha ta consisti di trata di eligi miho, respeta e proporcionnan y cuida e detayenan. Focus Digital Magazine ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
