Jesy Nelson di Little Mix a bisa cu e tabata sinti manera un robot, y el a afirma cu nunca el a spera cu e lo tuma un tempo liber pa e por descansa, pero awo el a dicidi di sali fo’i e banda. Dialuna siman pasa, Jesy a dicidi di sali fo’i e grupo Little Mix. E cantante tabata den e grupo pa nuebe aña y el a sali pa e por focus riba su salud mental. Tambe el a papia tocante e presionnan cu el a sinti ora e tabata parti di e banda Little Mix.
Jesy ta relata con un biaha e mester a wordo inyecta cu calmante pa dolor cincuenta biaha pa e por a presenta riba stage cu e banda. Den dos di e autobiografianan di Little Mix, e cantante ta papia di e situacionnan aki. Den e autobiografia Our World na 2016, por lesa con el a logra presenta na Merca durante e show America’s Got Talent, a pesar cu e tabatin hopi dolor. E ta splica cu riba e dia ey, e tabatin un lesion na su schouder, cu e no por a ni move, sintiendo cu e tabata den agonia, gritando. Un parti di e show tabata cu e mester a bula fo’i stage, pero e no a kere cu e lo por a hacie.
E tabata un presentacion na TV hopi grandi pa nan, y tabata e rason dicon nan a bula bay Merca, p’esey el a sinti cu e tabata obliga di cumpli, ‘no matter what’. Jesy ta conta cu e mester a bay doctor pa ricibi cincuenta inyeccion na su schouder, paso e tabata den asina hopi dolor cu e tabata yora. Diabierna ultimo Jesy a publica su prome post riba instagram desde cu el a anuncia cu e lo sali for di Little Mix. Den e post e ta bisa cu e apoyo cu el a haya di su fans, a pone bira hopi emocional. Jesy a skirbi: “Mi kier gradici tur di boso cu a mustra mi tanto amor y apoyo durante e ultimo dianan aki, un par di boso mensahenan a pone mi bira hopi emocional, mi ta aprecia hopi, mi ta stima boso tur”.
