Sali core bay pafo cu maleta, ta atrae biahe, uza panti cora pa amor, enfin tin diferente opcion di ritual pa ricibi e Aña Nobo y despidi di esun bieu. Algun persona ta kere den nan y ta hacie y tin otro, cu ta opta pa keda sceptico. Berdad ta, cu e energia ta existi y tin dia cu e ta carga, manera 31 di december, fin di un aña y inicio di un aña nobo, cu cerca e Chinesnan ta conoci como Aña di Buey.
2021 ta un aña di buey, desde di 12 februari 2021(Chinese lunar New Year Day) y te 30 di januari 2022. E ta un aña di buey di metal. E ultimo añanan di zodiaco di e signo di buey tabata: 1961, 1973, 1985, 1997, 2009, 2021, 2033… Un aña di Buey ta pasa cada 12 aña. E aña di Buey di Metal ta bin net tras di e Aña di Djaca (2020) y prome cu e Tiger di Awa (2022)! E lo bay ta un aña di suerte y tambe perfecto pa focus riba relacion, ya sea di amistad of di amor.
Pa esunnan cu si ta kere den e energia, aki tin 3 opcion di hechizo di amor.
1. PA ATRAE E AMOR
Si bo kier atrae e amor den 2021, percura pa 31 di december bo busca un papel blanco, un pen cora, un quartz blanco y un bela ros. Riba 31 di december bay den bo camber (segura cu niun hende ta molestia bo) y cu e pen cora haci un lista di loke bo kier haya den bo proximo pareha. Despues ripiti den bos halto: ‘Ami (bo nomber) merece un homber bon y mi ta pidi un persona pa compaña mi den e bida aki cu e siguiente caracteristicanan: ‘(lesa loke bo a skirbi riba e blachi).
Marduga, net algun minuut prome cu e kloknan zona, pone e papel cu e quartz na un lugar cu nan por ricibi e rayonan lunar. Despues di mey anochi, coy e papel y e quartz y kima nan cu e bela ros. Warda e quartz, pasobra esey ta bay ta bo amuleto di bon suerte pa e amor durante e aña.
2. PA ALEHA UN PERSONA DI BO RELACION
Tin un persona cu no ta laga abo of bo pareha na paz? Freeze e! Si bo kier aleha un persona indeseabel, percura pa riba 31 di december bo skirbi riba un papel su nomber completo y den un luga cu bo ta bo so, bisa den bos halto: ‘Ami (bo nomber) ta ordena pa bo laga mi na paz. Mi no ta desea bo malo, pero di awo en adelante bo energia negativo no tin poder riba mi relacion mas y bo no por molestia nos mas. Asina lo ta’. Despues, parti un lamunchi den mitar y hinca e nomber di e persona memey. Finalmente pone e lamunchi den freezer.
3. PA LUBIDA UN AMOR BIEU
Ta dificil pa laga un amor antiguo bay? E fin di aña aki ta e oportunidad perfecto pa cera e ciclo cu ne y habri un decada nobo, unda cu e magia por yuda bo. Bo mester di un blas di helium, un pida di cabuya cora, un papel biña, un pen ros, un potret di boso dos y un bela blanco. Durante e anochi di 31 di december, skirbi cu e pen ros riba e papel biña, e motibonan cu bo kier laga e amor aki bay. Posteriormente mara e na e blaas di helium cu e cabuya cora y na dje, e potret di boso dos. (of esun di dje den su defecto).
Durante e anochi, ora cu e kloknan bati mey anochi, bay pafo y laga e blaas cu e potret mara na dje bay. Despues kima cu e bela blanco e papel biña, bisando den bos halto: ‘Ami (bo nomber), ta laga bo liber. Ya bo no lo causa mi mas dolor, ni ami lo haci na abo. Ta feliz sin mi, manera cu ami lo ta sin bo. Asina lo ta.’ Laga e biento bay cu e shinishinan.
ALGUN ‘RECETA MAGICO’ PA TIN UN MIHO AÑA NOBO
Banda di esunnan tradicional, scoge entre e ‘recetanan magico’ aki y agrega nan na bo ritual di 31 di december.
Awa: ta simbolisa expulsa di bo bida e lagrimanan, e penanan y e negatividad. Tira un glas di awa desde bo cas pa riba caya.
Cambia prenda: ta coresponde na fortalece e relacion cu bo pareha. Si boso tin algun problema, intercambia un prenda cu boso tin bisti, asina boso destino ta completamente liga na otro.
Basora: ta simbolisa expulsa di bo cas e vibracionnan malo, pena y negatividad. Bari cu un basora desde e porta di bo cas pa caya.
Potret cu cinta: si bo kier cierto persona duna bo su amor, mara un cinta cora na su potret y drumi e anochi ey cu ne, bou di bo cusinchi.
Bonchi: tin di haber cu abundancia, prosperidad y economia di henter e aña. Come un cuchara di bonchi, ora ta 12or.
Lista di deseo: pa tur bo soñonan bira realidad, haci un lista di anhelo y solucion na bo problemanan, dobla e papel y habrie 12or di anochi.
E luznan cendi: ta relaciona cu bo hogar pa emiti prosperidad y exito ful e aña, pues ricibi e aña nobo cu tur e luznan di bo cas cendi.
Mesa decora: pone bo miho paña di mesa, set di tayo y glas cu ta coresponde na prosperidad. Tin algo di color di oro na mesa, pa no falta placa y e belanan color cora, pa no falta amor den famia.
Placa: ta referi na bon fortuna y prosperidad, warda 12 placa di e mesun denominacion y durante e yegada di aña nobo, tira nan den shelo.
Papel kima: si bo kier elimina e cosnan negativo di pasado, skirbi nan riba un papel y kim’e, pa nan no ripiti den e aña nobo cu ta bin.
Paña blanco: ta relaciona cu aleha e enfermedadnan y atrae bon salud.
Sinta y para: si bo kier atrae matrimonio, sinta y para durante cada un di e 12 biaha cu e holoshi bati 12or.
Stoel of trapi: pa e proximo aña ta uno di ascenso continuo tanto profesional como personal, subi riba un stoel of un trapi.
Bela: Segun su colornan, nan ta atrae diferente energia entre bo sernan keri: blauw ta paz; geel ta abundancia; cora ta pasion; berde ta salud; blanco ta claridad y oranje ta inteligencia.
