Miss Canada, Nova Stevens, a comparti riba su Instagram su decepcion cu algun fanatico di e concursonan di beyesa di cierto paisnan. El a skirbi cu nan odio ta kita tur e fun di e experiencia unico aki den bida. Ta realmente asina dificil pa comparti amor na luga di odio? Niun hende ta bisando cu bo mester apoya tur e concursantenan, loke ta bisando ta pa apoya bo representante sin tumba otro. No ta necesario dim e luz di otro pa bo briya.
Den su post Miss Canada a skirbi cu e mundo ta evolucionando, cu e hendenan ta realisando cu beyesa no ta exclusivo di un grupo specifico di persona. E definicion di beyesa ta aplica pa tur hende: pasobra beyesa por ser mira den diferente forma, tono y tamaño. “Por fabor, mira e beyesa cu tin na e mundo aki. Nos no mester tin e mesun apariencia, gewoon nos mester trata otro di mesun manera”.
Nova Stevens a wordo manda su so Canada cu su 6 aña di edad, despues cu su famia a huy di e guera civil na Sudan. Creciendo separa di su famia, Nova a aprecia e importancia di fomenta un desaroyo saludabel y busca continuamente oportunidad pa sirbi e hobennan Canades. Nova ta co-fundado y portavoz di ‘Freedom March Vancouver’ y ‘Black Freedom Society’, cu su mision ta elimina e odio y racismo cu e hendenan di color scur y indigenanan di color ta experencia.
Miss Canada tin afinidad pa actuacion y modelahe, y el a aparece den e produccionnan di e industria cinematografico na Vancouver. E ta expresa su mes a traves di arte y movimento y el a traha na nivel internacional den Fashion Week rond mundo. Nova Stevens a competi 3 biaha den e certamen di Miss Universe Canada, terminando miho cada biaha y finalmente ganando e titulo na aña 2020.
