Marisol Lopez Tromp tin un carera extenso di 23 aña den politica den cual e tabata parlamentario pa basta aña, parlamentario independiente dos biaha, minister varios bes, vice prome minister, lider di fraccion y presidente di parlamento. Awo Marisol tin un reto nobo: Lider di partido Movimiento Arubano Soberano (MAS). E decision aki el a tuma despues cu na october 2020, el a wordo baha como minister na un forma inhusto y ilegal. Despues di ta un periodo na cas, pueblo a pidi Marisol pa sigui den politica y esey Marisol a cumpli cu ne.
Partido MAS a lanta cu un meta specifico cual ta no solamente e lucha contra corupcion den e aparato gubernamental, pero tambe pa bringa pa e bienestar di nos hendenan. E campaña ta dirigi riba e contacto cu hende y scucha e deseo di e ciudadanonan, y asina haya sosten di e pueblo pa drenta den parlamento di Aruba. Hopi ta puntra cu ken MAS lo ta desea di traha si haya e oportunidad, pero segun Marisol ta pueblo ta dicidi esaki. Cada eleccion ta nobo cada biaha. Pueblo ta vota di nobo y no por keda wak e situacionnan bieu, ya cu e partidonan grandi no necesariamento lo keda grandi y e partidonan chikito tambe por crece bira grandi. Esaki ta depende di e voto di cada ciudadano. Pueblo ta esun cu ta dicidi y no mester asumi cosnan di antemano. Esaki ta e realidad cu nos mester biba cu ne.
Cada partido tin su identidad y e lucha- y causanan cu e ta para p’e
E causanan di MAS ta uno grandi ya cu tur hende sa di unda Marisol ta bin, y con a yega e forma cu MAS ta bayendo eleccion awe. Despues di tur loke Marisol a pasa aden, e experiencianan aki ta haci bo hopi mas consciente di e problemanan den nos sistema democratico y nos gobierno.
E biaha aki Marisol lo experiencia e periodo aki como lider di un partido cual ta un experiencia nobo p’e. E ta un funcion cu mas responsabilidad, y e tareanan en comun cu e partido compara cu si bo ta un candidato. Esaki ta e proceso cu e ta pasando aden den un periodo mas cortico cu normal. MAS ta campañando di dia y di nochi y no tin barera. E forma di campaña lo ta uno diferente y sin mucho buya.
Den MAS bo por wak kico e partido ta para p’e y transparencia ta esencial. E ciudadano sa kico e ta haya bek mirando kico Marisol y e partido ta para p’e. Ta traha transparente y ta para contra corupcion.
MAS tin un programa di partido realistico, pues pueblo por ta sigur cu sosteniendo MAS bo tin e siguransa di tende e berdad den tur ocasion, papia e berdad manera e ta, sin exagera y sin kita sin pone. E momento aki ta uno crucial. Pueblo ta dicidi si ta keda cu e mesun politica anticua of si ta bin cu un cambio.
