Pa seis aña caba FOCUS ta highlight pa e luna di juli e temanan tocante Salud, Beyesa y Bienestar. E portada ta ilustra Joana Alvarez, un hende muhe multifacetico como mama, esposa y empresaria, cu ekilibrio den su bida personal y profesional. E ta conta cu el a dicidi pa haci un cambio den su estilo di bida, desde cu el a compronde cu un curpa sano ta e refleho di un mente saludabel y feliz. E momento cu un persona implementa custumbernan saludabel den su bida, e ta permiti pa biba cu mas intensidad, energia y vitalidad. No solamente na nivel di salud, sino alabes ta haci e persona mas sigur, constante y disciplina, cu ta aplicabel den diferente faceta di su bida. Logrando e ekilibrio perfecto entre mente y curpa, no ta solamente mustra bon sino ta laga bo sinti bon y saludabel.
Desde cu Joana a yega Aruba aña 2009, el a keda encanta cu tur loke e isla a representa. E hendenan rond di dje a lag’e sinti manera na cas. Den algun momento di su bida, el a imagina cu e lo kier biba na un luga trankil, cu por brinda e siguridad cu su pais no a dun’e pa tanto tempo. Aruba a habri su portanan pa brinda e oportunidad ey, di traha duro pa logra su obhetivonan. E transicion no tabata facil manera cualkier stranhero cu yega pa establece na un otro pais, cu ta pasa den un proceso di transicion fuerte. E no ta papia solamente di e hecho di emigra y laga atras loke e tabatin y cuminsa di nobo leu for di e sernan cu bo ta stima cu no ta facil, pero e ta kere cu esey tabata e motor perfecto pa a cuminsa di nobo.
Pa yega unda e ta awe, pa ta doño di su empresa Real Time Media y socio di ROLL Sports Wear, ta un muestra di su constancia y determinacion. E poder desempeña den loke e ta stima, ta e bentanan enfoca den e medionan di comunicacion, cu a converti den un pasion y realmente e ta disfruta esaki, pasobra e por organisa su tempo y asina por enfoca no solamente riba su famia sino den un proyecto cu a nace memey di e pandemia, y el a transforma den su proyecto di bida cu yama ROLL Sports Wear. Locual nan ta busca pa laga un marca positivo na momento di implementa e custumbernan saludabel den un hende su bida.
Lo sigui elabora den un siguiente post riba e contenido di FOCUS Digital Magazine di juli, cu ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet.
