Dos shimis di bruid cu ta na top como e shimisnan mas popular di e ultimo decada, ta di dos boda real, segun un estudio nobo di e specialistanan di regalo britanico Find Me a Gift. E estudio a analisa e cantidad di buskeda via Internet di e shimisnan di bruid di e celebridadnan di e añanan ‘10s, pa persona.
E shimis di Givenchy ‘off-the-shoulder’ y velo detaya di Dukesa di Sussex, a bay cu e prome luga, cu un averahe di 21,900 buskeda mensual na Reino Uni, desde e casamento di Meghan Markle cu Prins Harry na 2018. E shimis di seda di e dukesa, di e diseñadora britanico. Claire Waight Keller, tabatin un ‘bateau neckline’ habri, manganan tres kwart y un cola flowy. E velo di twil di seda su rand tabata borda na man cu e flornan di e 52 paisnan di Commonwealth, mescos cu e flor poppy di su estado natal California.
E shimis di canchi di Alexander McQueen cu e Dukesa di Cambridge a bisti dia el a casa, a gana di dos luga cu un average di 21.500 buskeda mensual na Reino Uni, desde su matrimonio real cu Prins William na 2011. E shimis pega na curpa cu cueyo den forma di V, di un ekipo creativo dirigi pa e diseñadora britanico Sarah Burton, elabora cu e canchinan: French Chantilly y English Cluny, cu un saya hancho y un cola di casi nuebe pia. Kate Middleton a bisti un velo di twil di seda y e tiara ‘halo’ di Cartier.
E otro shimisnan di bruid di e celebridadnan cu a logra wordo inclui riba e lista ta esun di Hailey Bieber dia el a casa cu Justin Bieber na 2018, y Ariana Grande su shimis strapless haute couture di Vera Wang di su boda intimo na mei na 2021 cu Dalton Gómez.
