Diabierna ultimo, Bob Saget a wordo dera durante un ceremonia na Los Angeles. E entiero a tuma luga cinco dia despues cu e comediante di 65 aña a ser haya morto den su camber na hotel di The Ritz-Carlton. Durante e dia ey, e tabata den su gira y e anochi prome cu su morto, e tabatin un stand-up comedy di hopi ora largo. Aunke e servicio tabata chikito, varios di Bob Saget su amistadnan cercano a atende e entiero, incluyendo su co-protagonistanan di Full House: John Stamos, Dave Coulier, Candance Cameron Bure, Jodie Sweetin, Lori Loughlin y Mary-Kate y Ashley Olsen.
Inmediatamente despues cu e noticia di su morto a sali, e miembronan di e comunidad di Hollywood a rindi homenahe na e strea riba nan rednan social. Cameron Bure, cu a interpreta e yiu di Saget, DJ Tanner, den Full House a publica varios imagen riba Instagram, incluyendo uno unda cu el a yama Saget ‘e lijm’ di su famia Full House. E ta conta: “Nos semper tabata profundamente conecta desde e dia cu nos a conoce otro ora mi tabatin 10 aña”. E ta sigui bisa:“Bo no tabata solamente manera un tata pa mi, pero tambe un di e miho amigonan den mi bida. Esaki ta haci dolor manera algo cu nunca mi a yega di sinti. Mi ta stima bo, mi ta stima bo, mi ta stima bo”.
John Stamos a reacciona tocante e perdida di Saget riba twitter: “Mi ta kibra, mi ta destrosa”. El a skirbi: “Mi ta den un estado di shock total y absoluto. Nunca mi lo tin otro amigo manera e. Mi ta stima bo hopi, Bobby”. Prome cu e entiero diabierna, Stamos a revela: “awe lo ta e dia mas dificil di mi bida”. Otro tributonan a inclui uno di Chappelle, ken a comparti cu Saget a mande un mensahe prome cu su morto, pero nunca e tabatin e oportunidad di contesta.
Chappelle ta conta: “El a caba di manda mi un mensahe y mi a wak e texto ayera, pero mi no a contesta door cu mi tabata bezig”. El a bisa cu e cosnan aki sa pasa, e ta gewoon bisa esaki pa corda cu e momentonan aki ta precioso. Jimmy Kimmel a agrega cu Bob tabata e persona di mas sweet, cu e tin hopi mensahe y emails amabel y yen di apoyo di dje. Semper e tabatin un compliment: “Tin biaha e lo message mi pa bisa mi cu e ta stima mi. Y mi sa cu e tabata haci esey cu hopi hende”.
