Lisa Hanna cu tabata e Miss Jamaica corona Miss World na 1993, y cu awendia ta politico y Miembro di Parlamento na su pais, a reacciona riba e comentarionan cu el a ‘snub’ Kate Middleton riba e prome dia di e gira di e Duke y Dukesa di Cambridge na Jamaica. Lisa Hanna, cu ta miembro di oposicion y un di e muhenan mas hoben cu a ser eligi pa parlamento, a bay viral pa e manera cu el a bira su cara mientras Kate tabata trata di bisa algo sin perde den niun momento su sonrisa.
E actitud di e autoridadnan oficial mientras nan tabata saluda e Duke y Dukesa di Cambridge, a ser analisa te na e minimo detaye, buscando algun señal di tension of algo desagradabel. Den e video cu a circula riba e rednan social, unda por a mira Lisa Hanna comosifuera e ta ignorando aparentemente e casa di prins William, a ser critica fuertemente. Miss World 1993 y politico Jamaiquino a comparti riba su Twitter diferente potret, unda e ta aparece ta combersa masha normal cu Kate, y a aclarea cu nan a mantene un combersacion hopi agradabel.
Prins William y Kate Middleton a yega Jamaica cu un bonbini dividi entre grupo di hende curioso cu a reuni pa wak nan baha di avion y e hendenan manifestando bisti cu franel geel y cu borchi di protesta contra Reino Unido. Den mesun comunicado cu Lisa a manda pa aclarea su interaccion cu Dukesa di Cambridge, el a remarca tambe cu su partido ta sigui busca sistema y strategia pa libra di e monarkia, pero esey no ta significa cu mester mustra onbeleefd cu un invitado.
