Ta conoci cu un alimentacion saludabel ta di gran importancia pa salud general y un calidad di bida halto. Pero banda di enfoca riba kico nos ta come ta importante pa evalua tambe cuanto y con nos ta come! E recomendacionnan riba e cantidad cu un persona lo mester come riba un dia ta depende di diferente factor, e.o. e persona su edad, sexo, haltura, peso, actividadnan (fisico) riba un dia, cultura y preferencia nutricional (p.e. vegetariano of vegano).
Un instrumento cu por uza pa esaki ta e ‘Hunger Scale’, unda cu for #1 te #10 por midi na momento cu nos tin un hamber insoportabel y te ora nos lo kier stop di come. Come den exceso habitualmente por significa cu nos ta come a pesar cu nos ta yen, ignorando e señalnan di nos curpa cu ta bisa nos ora nos tin hamber of ta yen caba.
Un dietista of nutricionista lo por yuda calcula y evalua cuanto un persona lo mester di diferente grupo di alimento. Den Focus Digital Magazine di augustus, Charlene Leslie di ‘Alimentá Dietetics & Health Promotion’, ta duna su recomendacion relaciona e cantidad cu ta valido pa mayoria persona. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
