Awe dia cu ta pone atencion special y cu mensahe di conscienitsacion en conexion di Dia Internacional di Animal, ta resalta un fundacion cual su obhetivo principal ta pa mehora e calidad di bida di e cacho- y pushinan di caya na Aruba. Aruba Animal Shelter a ser funda pa Julie y Joseph Horingrad, cu e ayudo incalculabel di Ivonne Quandus-Hieroms dia 8 di augustus 1987. Na 1996 e shelter a ser muda pa su cede actual na Wayaka 128-B, unda nan ta sigui brinda servicio.
Den total ta 35 aña di un labor bunita y satisfactorio, aunke tambe hopi frustrante ya cu e problema di e cacho- y pushinan di caya ta continua, a pesar di e esfuerso grandi cu nan ta haci hunto cu otro organisacionnan, y e programa increibel di ‘stimami sterelisami’. Mientras e poblacion di nos isla no ta compronde e importancia di sterilisa of castra nan mascotanan, lamentablemente e problema no por wordo soluciona.
E BOLUNTARIONAN TA DUNA HOPI AMOR Y CARIÑO
Cada cacho cu drenta e shelter ta wordo hiba veterinario unda un test di sanger ta wordo haci, esaki ta sumamente necesario door cu 99% di nan ta yega cu enfermedad di carpata, cu consecuencia cu nan mester haya e tratamento necesario pa elimina esaki; despues nan ta ser baña, desparasita, alimenta, trata cu nextguard of cualkier otro producto similar. Nan ta wordo vacuna tambe momento cu nan wordo sterilisa of castra.
E siguiente cu nan ta haya ta hopi amor y cariño di e boluntarionan. E pushinan ta haya e tratamentonan similar aunke e problema principal cu nan ta ‘ear mite’ loke tambe nan ta soluciona, aunke nan no ta vacuna. Cualkier problema di salud di nan animalnan ta ser trata pa e veterinarionan, loke ta haci cu e gastonan di mantencion di e shelter ta haltisimo. Esaki ta e rason principal pakico nan no por tin mas animal.
SAVE THE DATE
E aña aki pa celebra nan 35 aña, Aruba Animal Shelter a dicidi di organisa un biaha mas nan DOG SHOW riba diadomingo 30 di october di 3:00pm pa 8:00pm na Villa Floralina. Nan ta invita e pueblo di Aruba pa comparti un dia diferente y yuda pa un causa noble. Tur e cachonan ta bonbini pa participa den tres categoria diferente: 1. Beyesa – 2. Obediencia & Tricks – 3. disfras di Halloween.
Pa participa bo mester simplemente inscribi online https://forms.gle/Ru8uzUm5RfSkvbz36 of bay personalmente na e Shelter. Ademas di e show lo tin cuminda y bebida, pintamento di cara, weganan pa mucha y nan famoso rifa cu tremendo premio cu ta inclui: weekend-stays, hotel day-packages, dinner & breakfast for two, joya, electronic devices y hopi mas. Disfruta di un diadomingo den un ambiente diferente mientras ta contribui cu Aruba Animal Shelter.
