Aruba Bank a haci entrega di e reconocementonan na e empleadonan cu a destaca den 2022 durante un ceremonia casual na Neighba. E reconocemento di e empleadonan di aña den cada departamento ta wordo escogi a base di ehecucion di trabou ehemplar durante henter aña.
E reconocemento ta inclui no solamente e ehecucion di nan responsabilidadnan na un nivel superior pero tambe riba nan contribucion na e mision, metanan, balornan y strategia di e banco. Durante e evento pa haci entrega di e merecido reconocemento na e empleadonan, tur a comparti e alegria di a ricibi e premio aki cu nan coleganan. Tur presente por a scucha algun anecdota y storia cortico di e nominado y su contribucion.
Durante di e ceremonia a anuncia esunnan cu a sobresali den nan esfuerso y resultado, di cada grupo. Danella Tromp, Louisette Halley, Herman Brown, y full e departamento di Credit Administration Retail & Corporate Department cu a ricibi nan reconocemento maximo y alabes a otorga Nicolaas Maduro, Sandy Geerman y Mariela Erasmus cu e ‘Lifetime Achievement Award’ pa nan dedicacion pa mas di 40 aña na Aruba Bank.
Cada un di e coleganan ta contribui diariamente na e logronan y metanan di e compania, sin e dedicacion aki mucho no lo ta posibel. Esunnan nomina a logra destaca durante 2022, y pesey nan ta reconoce nan esfuerso y dedicacion incansabel cu nan a demostra tanto pa e banco como tambe e clientenan. Na final di e anochi tambe Aruba Bank a dedica un ‘Special Award’ na nan colega Deaxo Croes pa su tremendo perseverancia y dedicacion, cu el a demonstra pa nos comunidad cu su tremendo hazaña di Crossing for Prevention.
