Un aña cu nunca di su bida Ruby Paola Pouchet (27) lo por lubida ta 2023 como cu esaki ta e aña di su reinado. Cu e logro como Miss Bonaire 2022 e kier demostra cu ora bo hinca esfuerso, disciplina y amor pa logra un meta, bo por cumpli cu tur cos cu bo pone bo dilanti. El a traha hopi duro pa e titulo, paso e tabata un deseo scondi di Paola pa un dia participa na e certamen di Miss Bonaire.
For di basta tempo caba e tabata wordo curasha pa diferente persona pa drenta den e mundo di beyesa, pero semper e tabatin miedo. Na momento cu e organisacion di Miss Bonaire a acerca Paola, el a dicidi pa bay p’e como un reto pa su mes pa enfrenta su miedonan y haci algo bon pa su mes mientras esaki ta yuda cu su confiansa propio. E ta contento cu el a haci esaki y ta super agradecido na tur hende cu a apoy’e y yud’e di un manera of otro durante henter e trayecto aki.
Boneiro pa Ruby Pouchet ta e luga di mas bunita na mundo y ta un honor di por representa e isla aki. Ser Miss Bonaire ta un logro cu e tabata desea berdaderamente di profundo di su curason, p’esey na e momento cu el a keda corona el a sinti cu e ta den e nubianan, manera cu e tabata bezig ta wak su mes di otro punto di bista. Paola a sinti hopi emocion di mix cu otro, algun di nan tabata un felicidad inmenso, alivio, sorpresa pero esun di mas grandi tabata orguyo.
Como e Segunda Finalista den e certamen di Miss Bonaire 2022 a keda e representante di Nikiboko, Michell Emerenciana, mientras Caroline Porras, e representante di Antriol a keda como Prome Finalista y a wordo corona tambe como Miss Turismo Bonaire. Por haya sa mas di Miss Bonaire 2022 den edicion di Focus Digital Magazine di januari, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
