Rey Willem Alexander y Reina Máxima hunto cu Prinses Amalia a cuminsa nan gira na e parti di Caribe di Reino, cu lo ta for di 27 di januari te cu 9 di februari. Esaki ta e prome biahe oficial di e heredera di e trono, cu desde el a bira mayor di edad a adkiri un compromiso mas grandi cu su debernan real, y tin como obhetivo principal su presentacion na e islanan Bonaire, Aruba, Curaçao, Sint Maarten, Sint Eustatius y Saba. Un travesia trasatlantico marca pa un agenda basta exigente door cu Prinses Amalia lo mester acudi na alrededor di setenta acto.
E pareha real hunto cu Prinses van Oranje ta yega Aruba dialuna mainta, unda tin un ceremonia di bonbini na Wilhelmina Park. Despues di un combersacion cu gobernador Alfonso Boekhoudt, lo sigui un caminata pa Parlamento di Aruba y Cocolishi pa un encuentro cu e miembronan di Parlamento di Aruba. Lo sigui un encuentro cu Prome Minister y Conseho di Minister pa despues continua pa un lunch cu Sra. Evelyn Wever Croes y demas Ministernan. Band’i caminda nan lo ser saluda pa e publico y lo tin un leerorkest y un coro hubenil cu lo presenta.
E parti di atardi lo ta dedica pa bishita San Nicolas, unda na Filomena College lo tin presentacion di e ‘mural’ di Boy Ecury. Lo tin un bishita breve na Museum of Industry y lo sigui pa un paseo den e cayanan di San Nicolas, unda tin e otro muralnan colorido cu a ser crea durante Aruba Art Fair pa artistanan local y internacional. Finalmente lo presencia un espectaculo di breakdance, ‘spoken word’ y un presentacion di carnaval door di hobennan. Asina e famia real ta finalisa nan prome dia di bishita na Aruba.
