Embassy Suites by Hilton Aruba Resort ta organisa un ‘Job Fair’ diahuebs awo dia 20 di april. Esaki ta bay tuma luga for di 10or di mainta pa 5or di atardi den Bubali Ballroom di e resort. E ta un gran oportunidad pa e comunidad di Aruba cera conoci cu e diferente departamentonan. E resort ta brinda e oportunidadnan pa crece den un carera profesional den e sector turistico, ademas di tur e beneficionan cu ta ricibi trahando na e resort aki. Embassy Suites by Hilton ta un resort cu tin un hopi aprecio pa nan team.
For di prome cu nan a habri nan portanan pa turista, a organisa varios actividad great pa nan ‘team members’. Un dia prome di a ricibi e prome huesped, nan a celebra cu full e ekipo un ‘Team Member Rally’. E dia aki tur hende a participa na diferente actividad y trivia, ganando bunita premionan y nan a disfuta di e dushi cuminda cu a wordo sirbi. Pa cera e dia exitosamente e popular artista. Ataniro, a haci un presentacion poniendo ambiente unda tur hende a baila y diberti nan mes.
Pa celebra Dia di Himno y Bandera a haci un toke unico pa celebracion di e fecha special aki. E ekipo culinario a prepara cuminda crioyo sabroso durante nan ‘lunch break’ y tabatin un show di baile folklorico cu tur hende a gosa masha hopi mes. E mas recien actividad cu a ser organisa ta ‘Easter’ cu un ‘egghunt’, unda e miembronan di e ekipo di e resort a entretene nan mes buscando webo di pasco den e diferente gangnan. Pa e ocasion aki tabatin 10 diferente premio cu a keda reparti entre e ganadornan.
E ekipo di Embassy Suites by Hilton Aruba Resort ta entusiasma pa ricibi tur hende interesa pa join nan team y comparti informacion riba e dia di nan ‘Job Fair’. Ta sumamente importante pa trece CV riba e dia aki.
