Dos mama ta comparti con nan ta experenciando e cambio den nan bida cu nacemento di nan prome yiu. Stacey Croes-Banfield y Zaira Orman-Maya cada uno ta conta con nan a adapta nan estilo di bida cu un miembro nobo den e famia.
Maternidad a cambia Stacey Croes-Banfield completamente como persona y awo cu e tin Maddison ‘Maddie’ Rea den su bida, e ta su prioridad y nan tempo hunto ta sumamente precioso. E por bisa cu ainda e ta en busca di e balans ideal y cu e ta satisfecho cu ne, pero mientrastanto e ta focus riba ‘quality time’ ora mama y yiu ta hunto. Stacey ta pone telefoon of cualkier otro distraccion un banda y ta enjoy mas cu e por di cada momento hunto cu Maddie. Desde cu Maddie a nace 28.08.2022, el a haya lechi di pecho y apesar cu e proceso di duna lechi di pecho tin su ups and downs, Stacey ta sinti cu e ta afortuna di por a duna Maddie lechi di pecho asina largo.
Desde 19.07.2022 cu Jensen Zachary a nace, Zaira Orman-Maya su focus a switch ful p’e, unda cu semper e tabata tuma decision pa su mes. Awo e ta basa su decision riba su yiu. E ta contento cu Paseo Herencia a compronde y apoya esaki door di lag’e bay trabou cu su yiu. Zaira ta trahando na Paseo Herencia den e funcion di Marketing & Events Manager. Un dia di mama y baby na trabou ta cuminsa normalmente mainta ora nan yega cu Zaira ta duna Jensen pecho y lag’e hunga den su oficina. Tin diferente beneficio di tin e baby cu ne na trabou y pa Zaira e beneficio primordial ta e dunamento di pecho y cu e por a experiencia su crecemento.
Stacey Croes-Banfield y Zaira Orman-Maya ta comparti nan bunita experiencia como mama den Focus Digital Magazine di mei, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
