Ambos tin mas cu 25 aña den servicio di Cuerpo Policial Aruba, pero den tur e añanan ey nunca Caroline Peterson ni Junny Sherwood nan atencion a cay riba otro. E tabata masha straño pa nan cu aunke nan por a pasa band’i otro mes na trabao, nunca nan a yega di crusa mirada te dia cu nan mester a traha durante temporada di Covid. Pa nan por a siña conoce otro pafo di e area di trabao tabata dificil e aña ey, pero Junny y Caroline a sa di tene pasenshi y no a forsa nada, pero despues di e prome date nan a bira inseparabel.
Caroline ta traha den Departamento di Recherche y Junny cu Cuerpo Especial Arubano como bewaker y transport di detenidonan. Caroline su trabao na recherche ta keep track di e casonan cu ta drenta y sali, traha cu cifra y investiga cosnan cu ta relaciona cu cierto casonan. Durante carnaval e ta traha den Commando pa mas di 10 aña caba pa dirigi carnaval y percura pa tur hende su seguridad. Tempo nan a conoce otro ambos tabata den e deporte di bodybuilding. E aña ey, Caroline tabata di prepara pa su prome competencia. Junny a cuminsa compaña Caroline na su trainingnan pa subi stage na aña 2021.
Bodybuiling ta importante pa ambos, paso e ta tene nan sano fisicamente y mentalmente. Nan ta di pensamento cu gym ta unda bo ta baha e stress di e dia y no na cas. Desde comienso Caroline y Junny a pone comunicacion como e cos di mas importante den nan relacion. No ta importa con druk nan ta, pero semper tin un momento durante dia pa manda un mensahe of algo di amor, bisando otro: “I Love You”. Algo peculiar como pareha ta cu nunca nan ta yama otro na nan nomber, pero pa un nomber di cariño cu nan ta uza semper.
Caroline Peterson y Junny Sherwood ta den Focus Digital Magazine di januari contando hopi mas detaye unico y tambe nan fabuloso celebracion matrimonial.
Focus Digital Magazine ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
