E actriz di e pelicula, Ferrari, Penelope Cruz di 49 aña, ta papia di su bida como mama di Luna di 10 aña y Leo di 12 aña, cu e ta comparti cu Javier Bardem. Penelope ta sali riba e portada di e edicion di februari di ELLE, unda e ta splica cu semper el a percura na sigura, si un dia su yiunan kier ta den spotlight, esey lo ta na nan propio tempo y den nan propio terminonan. “E ta pa nan dicidi si nan kier tin un trabou mas exponi na e publico of no. Nan por papia riba esaki ora nan ta cla”, el a bisa.
Como mama di dos yiu e ta admiti tambe cu e no ta permiti su yiunan tin telefon celular y ta bisa: “E ta hopi facil pa ser manipula, specialmente si bo tin un cerebro cu ainda ta formando. Y ken ta paga e prijs? No anos, no nos generacion, cu talbes a siña cu 25 aña, con un BlackBerry tabata funciona”, e ta continua bisando: “E ta un experimento cruel cu mucha y teenagers”. E actriz ta kere firmemente cu e rednan social y tempo dilanti pantaya no ta e miho opcion pa desaroya e mente.
Den otro parti di su entrevista, Cruz ta papia con el a interpreta rolnan cu e tabata mama hopi prome cu e mes a haya yiu, y cu maternidad ainda ta zona den hopi rol disponibel pe. Na su edad, 80% di e personahenan cu e lo interpreta ta tocante maternidad, divorcio, abandono of personanan cu no kier tin yiu, no por haya yiu of cu a perde yiu. Desde cu Penelope tabata un mucha ya e tabata sa cu e kier tin yiu, pero e tabata sa tambe cu e mester warda te ora e ta sinti su mes cla. E tabata sigur cu esaki ta e cos di mas importante cu e lo haci den su bida
