E coleccion mas special te cu awor pa e diseñadora, Rekha Croes-Daryanani, ta esnan cu e ta traha cu e palabranan inspirativo na Papiamento. E ta trece hopi mas cerca di cas, pero pa un otro persona cu no ta compronde Papiamento, e ta un misterio kico tin skirbi. Rekha a cuminsa su carera como diseñadora di joya na Aruba diseñando pa Rexa Bizou, un liña di acesorio traha na man cual e ta combina tanto e liña casual como esun di luho.
Rekha a cuminsa personalisa e acesorionan di cuero, den cual e tabata por pone nomber so riba nan. E tabata hopi trabou paso e mester a stamp cada texto, letter pa letter. E kier a bay mas leu cu esey y tabata busca e maneranan mas facil. El a logra di inverti den un manera mas lihe y facil pa personalisa practicamente tur cos. Asina nan a drenta den un direccion completamente nobo, cu a dune oportunidad di uza su creatividad y inspiracion pa traha e acesorionan cu ta significativo, inspirativo y personal.
Mayoria biaha Rekha ta haya inspiracion den su tempo den silencio cu Dios. Ora e ta haci su ‘devotionals’ hopi biaha e ta pidi Dios pa dune e mensahe, diseño of un palabra cu lo yega na e curason di hende y haci un diferencia. Despues di esey e ta diseña y grabe riba e acesorio cu e ta kere lo fit miho. Su meta ta pa tur diseño ta inspirativo pa asina bendiciona un otro persona.
E liña di acesorio na Papiamento a cuminsa na cadenanan cu palabranan inspirativo te cu awor nan ta personalisa practicamente tur acesorio cu palabranan inspirativo te pa poema di amor.
E diseñadora, Rekha Croes-Daryanani, den edicion di Focus Digital Magazine di maart ta splica tambe cu apart di joya, Rexa Bizou a lansa tambe un otro compania, Meaningful Things Aruba, cual ta personalisa tur otro tipo di material cu no ta joya. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
