E miembronan di Kiwanis Club of Aruba (KCA) ta druk preparando pa e Charity Gala di 2024 cu un tema inspira pa “Bridgerton” cu lo bay tuma luga diabierna 5 di october 2024 na Renaissance Convention Center. E musica confirma un biaha mas ta e bandanan mas popular di Aruba, esta Buleria, ‘N Fuzion y Tsunami. E maestro di ceremonia ta den man di DJ Metropolis.
E ballroom lo ta transforma completamente den e Regency Period, un periodo durante añanan 1800. Durante e fiesta por disfruta di un snackbuffet, open bar pa biña, spirits, craft beer y cocktails. E evento aki ta e oportunidad mas grandi di Kiwanis Club of Aruba pa recauda fondo pa por sostene diferente fundacion y proyecto, cu ta conta riba KCA anualmente.
Ebby Schwengle, president di e comision fiho di “Charity Gala” ta menciona: “Nos charity gala semper ta un exito rotundo danki na e esfuerso di Aruba su comercio, pero tambe personanan individual cu ta opta pa haci un aporte. E evento aki ta e oportunidad perfecto pa comunidad di Aruba disfruta di un gala sumamente elegante, bisti den tema of den gala attire, bailando riba e ritmo di nos miho bandanan, cu un tremendo snackbuffet y bebidanan di premium calidad, mientrastanto e net proceeds di cada ticket bendi lo bay directamente na proyectonan y fundacionnan sostene door di KCA. Comunidad por conta cu e fondonan genera ta wordo aloca unda ta prudente y unda ta necesario, pasobra tur proyecto y donacion semper ta pasa un screening extensivo di e club.”, Ebby ta clausura.
KCA ta gradici nan socionan cu ta patronisa e evento aki: Divino, Hodgson Trading, Cava y Bodegas Papiamento. E aña aki pa prome biaha Bersah Aruba lo ta presente cu nan linea di biña nobo. E parti di set-up y decoracion ta den man di Elite Productions y House of Mosaic, cu lo bay converti Renaissance Convention Center den un estilo sumamente decadente! E fiesta di gala ta di 8:30pm pa 1:30am. Pa tickets, cu ta AWG 450 pa pareha, por acerca cualkier miembro di KCA of via https://www.kiwanisclubofaruba.com.
 ta druk preparando pa e Charity Gala di 2024 cu un tema inspira pa “Bridgerton”){kind=link}