For di chikito Joanne y su rumannan a lanta den un hogar organisa caminda su mayornan a siña nan tanto e importancia como e beneficio di limpiesa y organisacion. Cada un di e muchanan tabatin semper nan tarea pa haci na cas, cual awendia Joanne Dirksz – Armantrading ta siña tambe na su 4 yiunan. E trankilidad cu un bon organisacion y planning ta trece den su bida, Joanne ta comparti cu mas hende a traves di Get Organized.
Na banda di Joanne su funcion cu e ta eherciendo como Contact Center Manager na SETAR N.V. , el a cuminsa cu Get Organized dos aña pasa. Cu e meta pa por yuda e hendenan cu organisacion pa nan tin un bida mas trankil, el a inicia na december 2022. Su logo tabata e prome post riba su cuenta di Instagram, @get.organized.aruba. Despues Joanne a cuminsa post Tips & Tricks y mas. Recientemente el a cuminsa cu un Facebook page: Get Organized Aruba.
Joanne Dirksz – Armantrading ta contento y satisfecho cu e reaccionnan y feedback cu e ta ricibi for di cliente, si nan a haci compra di un producto of un servicio cu e ta ofrece. Den Focus Digital Magazine di e luna aki, Joanne ta splica riba puntonan clave y beneficionan cu organisacion tin riba bo bida tanto na cas como na trabou. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
