E candidato number 7 riba lista di Partido Lucha pa Reforma, Michael Lopez, a lanta y biba semper den e bario di Dakota, unda Shon Lopez y su esposa Tina a lanta nan 5 yiunan cu disciplina, amor y cultiva dedicacion na nan estudio. Desde hoben Michael tabata persevera pa progresa y logra su metanan, unda sigur motiva pa su tata pa sigui studia.
Durante su dienstplicht e tabata bay Colegio Arubano anochi pa por a drenta universidad. Michael a bay Hulanda na aña 1986 pa studia ley y el a specialisa den Ley Laboral y Comercial. Na 1997 ora el a bolbe Aruba, el a bay traha bek na SVB, unda e tabata traha prome cu el a bay studia.
Michael na 1998 a forma parti di Ministerio di Labor unda el aporta su conocemento na bienestar di e pueblo di Aruba. Esaki tabata un experiencia cu sin duda a contribui den su carera riba tereno di labor. E aña siguiente su tata, Shon Lopez, a para patron pa e por a bira abogado, locual te dia di awe e ta eherciendo cu hopi pasion.
Durante e añanan ey, Ryçond Santos Do Nacimiento a acerca Michael pa e bin forma parti di Lopezlaw. Despues Ryçond a sigui studia y promove, y bira doctor den ley. Michael ta describi Ryçond como un persona sumamente inteligente den ramo di ley, confiabel y cu amor pa su prohimo.
Awendia despues di 25 aña Micheal Lopez ta sinti’e hopi orguyoso di por a guia varios abogado, cu ta trahando tanto na Aruba como den exterior. Michael ta wak atras riba un trayectoria exitoso y cu e tin tur e experiencia cu Aruba mester pa un cambio real.
Michael ta bisa cu e stempel parliament tin di bay pa pasado. E parlamentarionan mester por pensa pa nan mes y no riba orden di un minister. E ta mira solucionnan pa futuro desafionan riba entre otro tereno di labor, huridico, salubridad, vivienda, educacion y medio ambiente.
Na final Michael ta subraya cu nos no mester lubida e virtud berdadero di humildad. Conscientisando esaki lo suma na un Aruba mas prospero cu bienestar pa tur hende cu ta biba riba nos baranca tan stima.
Esaki ta locual Michael Lopez ta para firme p’e pa Aruba.
