Na momento cu Luna Canales a cuminsa siña tocante henter e mundo di koffie cu tabata nobo p’e, el a bira asina intriga cu e djis no por a stop di siña. E ta asina contento cu e generacion hoben ta formando parti di e fascinante bebida aki, cual lo significa hopi den futuro. Loke ta inspira Luna pa siña mas como un barista hoben ta cu en realidad e mundo di koffie ta henter un abismo cu bo mester explora casi manera un adiccion basicamente. Mas bo sa di dje… mas bo kier explora. Cana e caminda aki den un generacion nobo di koffie cu famia y amigonan na su banda ta Luna Canales su meta final.
Luna ta un persona responsabel, trahado y realmente creativo ora ta trata di haya inspiracion of crea cosnan nobo. E ta semper cla cu entusiasmo pa yuda. Su mente ta funciona asina diferente cu e por hasta sorprende hende tin biaha. “E mucha muhe mas disciplina cu mi a topa, unabes cu e kier algo e lo no laga bay te ora e yega na su obhetivo”. Esey probablemente ta algo cu e hendenan por bisa di dje, pero si e mester wak su mes den spiel, e lo bisa cu e ta en realidad un persona open minded, semper cla pa explora lo desconoci, cu gusta joke y haci pret, realmente sensitivo ora ta trata di pelicula y sernan keri. Semper e lo forsa su mes pa conserva un tiki di humanidad y ta siñando cosnan di su mes cada dia.
Mirando koffie crece y mundo birando mas curioso ta un empuhe grandi pa Luna sigui siña, pasobra e ta un elemento cu ta mucho mas cu djis un bebida. E tin añanan di historia y lunanan di trahamento pa e wordo sirbi den un copi. Un copi cu bo lo ta bebiendo na bo coffee shop preferi, pero e hecho cu e hendenan ta birando mas interesa den e likido fuerte di color maron aki, ta un noticia asina grandi pa tur e hendenan cu ta traha rond di e negoshi mundial aki. Pa Luna Canales esaki ta pone cu e baristanan ta sinti nan mes scucha y ansioso pa comparti nan conocemento.
Luna ta sinti cu mayoria hende no sa henter e historia tras di nan copi di koffie regular. No ta e hecho di bagatelisa nan, pero ta e hecho cu sociedad ta pensa cu barista ta esunnan cu ta haci tur cos, pero den e mundo di koffie tin asina hopi posicion! Nan barista ta djis sirbi e producto final, nan no ta planta e bonchi, ni piki nan, ni clasifica nan pa nan sali pa e mercado di koffie. Tin miyones di hende cu en realidad ta encarga pa haci esey pa nan como baristanan por haci nan job. Pues bo por yam’e basicamente un team mundial.
Su enfoke ta mas riba e hendenan cu ta cultiva koffie, cu sin nan nos lo no tin e bebida maraviyoso aki den nos man. Den edicion di Focus Digital Magazine di augustus, Luna Canales ta comparti su conocemento tocante koffie y kico como un hoben barista ta su meta. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Mayo Stoppels
