Alrededor di 9 aña pasa Francis Rugebregt a cuminsa core ora el a bin biba bek na Aruba. Prome cu e tempo aki, e no tabata gusta core en absoluto, pero pocopoco el a cuminsa bira un actividad cu a bira parti di su bida. El a mehora no solamente su condicion fisico, pero tambe a bira mas fuerte mentalmente y cera amistadnan nobo den e comunidad di coremento. Durante añanan el a keda train y reta su mes pa core distancianan mas largo te cu el a yega na e decision aña pasa pa bay pa e siguiente desafio, cual ta un marathon. Pues, Chicago Marathon tabata Francis su prome marathon.
E preparacion pa e marathon aki tabata hopi largo. Francis a haci dia 26 di april 2025 e Kentucky Derby Mini Marathon cu tabata un half marathon. E idea tabata pa uza e distancia aki pa keda bouw op te na e distancia di un marathon pa su curpa haya chens di ahusta pocopoco na e training load. Despues di a completa e half marathon aki, el a sigui train pa e Chicago Marathon cu a tuma luga 12 di october 2025. Aki el a sigui un plan di training di 20 siman. Banda di coremento e tabata haci strength training tambe 3-4 biaha pa siman den gym bou guia di Shanley Banfield. E caredanan largo durante training sin muziek a yud’e mentalmente crea e fortalesa mental pa core oranan largo.
Francis tabata prepara su mes tambe door di pensa claramente riba e meta cu e tabatin di caba e marathon stabiel. Banda di esaki come saludabel, drumi suficiente y tin un bon support system rond di dje tabata elementonan esencial pa prepara mentalmente pa e marathon. Francis ta biba un estilo di bida hopi active, unda e tin diferente hobby manera baile, toca piano y haci ehercisio fisico. E ta traha como un beleidsmedewerker na Inspectie Volksgezondheid Aruba (IVA). Aki e ta forma parti di un ekipo cu ta encarga cu crea maneho pa mehora e calidad di cuido medico na Aruba. Door cu e ta un organisacion chikito, e tin otro tareanan tambe manera maneha e website di IVA y ta encarga cu e proyecto di digitalisacion di e procesonan.
Coremento ta nifica personalmente pa Francis mas aleu cu deporte, pa record’e cu pa logra bo metanan den bida, bo mester tin pasenshi, disciplina y ta dispuesto pa traha duro y pasa den momentonan menos agradabel. Tambe coremento ta un recordatorio di e forsa fisico y mental cu e tin como persona y cu e por logra tur meta cu e pone su dilanti y pa no give up. Francis Rugebregt ta conta den Focus Digital Magazine di november di un reto inespera cu el a enfrenta riba e ruta di Chicago Marathon y con el a surpasa esaki. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
