Lisbeth Thijsen y Ramesis Ras tabata riba e portada di FOCUS pa e celebracion Dia di San Valentino, unda nan a conta e bunita storia di nan encuentro dia 7 di januari 2017 na Fakkel. Durante e añanan cu a transcuri nan a cana den tormenta y a baila bou di solo. Nan a enfrenta tristesa y a haya speransa den brasa di otro. Cada reto a bira un les y cada goso un bendicion. Hunto nan a construi un amor cu ta persevera, pordona y di confiansa. E matrimonio di Lisbeth y Ramesis no ta e comienso di nan historia sino e celebracion di tur loke nan a supera y tur loke nan ta soña di bira.
E plan di e pareha tabata pa realisa e proceso di nan matrimonio poco lihe door di e circumstancianan di salud di e mama di Ramesis. Lamentablemente destino tabata otro y un siman prome cu nan matrimonio, e suegra di Lisbeth a perde su bataya di salud. E deseo na su yiu Ramesis tabata pa nan sigui cu e plannan, p’esey nan a realisa e matrimonio den un seno familiar, compartiendo cu algun famia y amigonan mas cercano. E tabata un momento di emocionnan hopi mixto, apesar di tur tristesa tabatin alegria durante nan celebracion matrimonial dia 22 di december 2025.
Lisbeth y Ramesis tin 8 aña caba cu nan ta compartiendo un bida hunto, creando memorianan bunita, harimento, aventura y ta e steun pa nan famia. Cada dia nan ta siña di otro, aprecia cada gesto di amor y ta agradecido pa tur momento cu nan a biba hunto. Lisbeth y Ramesis Ras ta comparti den Focus Digital Magazine di e luna aki di nan plannan pa aña 2026. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
