AMALIA SIENNA: “WAK TE UNDA MI A YEGA TIN MI AINDA DEN SHOCK”

Aunke e inicio di Amalia Sienna Niebles Diaz den e mundo di beyesa tabata un tiki pret, locual a motiv’e pa representa Aruba na e certamen di Teen Universe International 2026, ta cu e gusta tuma riesgo. E gusta demostra su mes cu e ta capaz y ta algo cu no tur hende ta haya e oportunidad, p’esey el a bisa: “Pakico no? Ta un chens unico cu por saca e maximo for di dje”. E ta premira un victoria ‘back-to-back’ pa e corona y ta preparando super duro pa e reto aki na Nicaragua durante e certamen cual ta for di 23 di februari pa 1 di maart.

Amalia a haya un yamada aña pasa riba dialuna 25 di augustus di su mama, Emilia Lopez Henriquez, Edson Everon y Roberto Avalo, cu e gran noticia cu e ta bira e siguiente Teen Universe Aruba! Nan a bis’e tambe cu e no por nenga – nan kiermen si of si e ta bay – cual e no por a kere na prome instante, sinembargo cu tempo tur cos a bira hopi real. Apesar cu na comienso no tabata facil pa cambia su estilo di bida pa esun di miss, paso di un dia pa otro su bida a cambia por completo. Sinembargo cu tempo hopi mas tur cos a bira mas facil, paso e ta bira algo di dia pa dia. Un rutina unabes el a haya e motivacion di lanta bay gym, come saludabel, haci photoshootings y contenido.

Teen Universe Aruba 2025 ta keda motiva cu su rutina diario djis pa hecho cu e por lanta mainta agradecido di tin un dia mas di bida y salud riba e mundo aki. Amalia ta sigur cu hopi hende no ta wak’e asina cual ta basta lamentabel, paso bo nunca sa ki dia lo por ta e ultimo. P’esey e ta scoge pa semper ta contento cu e tin un dia mas, aunke si e ta tristo, rabia, contento, frustra, etc. Locual ta importante cu e tin bida y sigur e sosten di tur esunnan cu ta yudand’e manera su famia, amigonan, team y trainer. Nan motivacion sigur ta dun’e forsa pa lanta tur mainta y duna su 100% hasta ora e ta casi di give up… nan palabranan semper tin un manera pa lanta su animo.

Amalia Sienna Niebles Diaz, Teen Universe Aruba 2025, ta riba portada di Focus Digital Magazine di februari cu tin e toke special pa e celebracion di San Valentino. Amalia a traves di su participacion ta comparti su mensahe cu tur cos ta posibel den e bida aki y esaki e ta bibando como un hoben pa wak unda el a yega cual tin e ainda den shock. Lesa e entrevista den e revista di e luna aki, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)

Asistencia di produccion: Emilia Lopez Henriquez