Den e industria di DJ cu tradicionalmente ta domina mas tanto pa hende homber, nos tin na Aruba un DJ femenino cu a debuta cu un estilo impactante. Jennifer Becerra cu su participacion den e industria aki ta spera di por contribui na e snowball effect existente, unda mas muhenan por mira nan mes representa y sinti e confiansa pa explora e arte aki. Jennifer ta kere cu lo ta bunita pa por crea un espacio inclusivo na Aruba basa riba apoyo mutuo, unda muhenan ta sinti nan mes bon bini y empodera pa drenta e industria musical — no solamente pa participa, pero pa crece y florece.
Jennifer a crece den un cas Latino, unda famia semper ta na prome luga. For di jong el a siña ta orguyoso di su origen Colombiano y Cubano, mientras simultaneamente e tabata siñando mas y mas di e cultura Arubiano. For di chikito su mayornan a siñ’e pa ta su propio persona, cu su mesunan criterionan, pa para pa su mes y pa locual e ta kere aden. E ta hopi agradecido cu e por a nace y crece na Aruba, paso sin duda ta un privilegio pa por a crece na un isla unda diferente cultura, idioma y perspectiva ta wordo curasha y respeta. E balornan aki, Jennifer ta carga cu ne unda cu e bay.
Musica a hunga un rol grandi na su cas mientras e tabata creciendo. Jennifer a crece rond di dos musico masha talentoso y disciplina, cu e ta admira y respeta hopi. Anan hunto cu su mama, a purba introduci’e na musica for di un edad tempran, pero na e momento ey e no tabata consciente di e importancia di siña muziek. Awe e ta mira bek y ta reconoce cu compronde muziek riba un nivel mas profundo y sa toca un snaar instrument, ta un regalo masha bunita — algo cu e ta arepenti di no a follow through cu ne.
DJ-ing a drenta den su bida como algo spontaneo, cu e por a uza manera un creative outlet. E director musical di Sunny Ray Aruba, Jeremy Bonarriba, a sugeri pa e explora e mundo di DJing y purba haci’e on the side, sin presion alguno. Jennifer ta conta den Focus Digital Magazine di februari cu e tabatin e suerte di ta rondona door di DJnan cu experiencia y musiconan cu tabata dispuesto pa siñ’e tur locual nan sa for di cosnan basico te na su prome ‘gig’. Lesa e entrevista di Jennifer Becerra den e revista cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
