Ta e ganado absoluto di “Miho Spotting Image” den e competencia di Spotters Day tabata un sorpresa pa Aschwin Maduro. E experencia tabata algo unico cu e tabata hopi cerca di e avionnan caminda e por a saca e miho potretnan. E tabata su segundo bes participando na e Spotters Day cu Queen Beatrix International Airport ta organisa. E prome biaha el a sali di segundo luga y aña siguiente no tabata un excepcion pa bolbe participa y el a gana e prome luga. Locual mas ta emociona Aschwin ta ora e ta subi cerca di e avion of hasta ora un avion nobo mester yega pa prome biaha Aruba.
Aschwin Maduro cu tin actualmente 38 aña di edad, a nace y biba na San Nicolas cerca su mama/tata y wela. Band’i cas di su wela na Yuwana Morto cu ta conoci tambe como Kustbatterij tabatin un veld di un runway di avion, unda tabatin competencianan di avion di remote control y eynan e tabata subi flie. Aki ta unda su pasion pa fotografia di aviacion realmente a surgi mirando e avionnan aki cu verrekijker tempo e tabata mucha.
Aschwin a conoce su pareha Glendeline Schoop na 2015 y e siguiente aña nan yiu Aschline Maduro a nace. Nan a casa na 2018 y asina el a bin biba na playa. E ta traha na Post Aruba y su hobby ta fotografia, pero pasa tempo cu su famia ta algo cu e ta encanta masha hopi mes. Nan ta sali bay wak un movie of simplemente cana band’i lama. Den weekend Aschwin por pasa ful su dia sacando potret di diferente avion cu ta baha na nos dushi isla Aruba.
Den Focus Digital Magazine di e luna aki, Aschwin Maduro ta splica cu e ta supera e retonan tecnico den fotografia di aviacion door di wak cua angulo ta conta e miho storia, si e kier mustra movimento di e avion of mustra dinamica. Con luz, sombra y color ta yuda e emocion. Fotografia di aviacion tin retonan serio, pero nan por domina cu un mescla di preparacion, adaptacion y pasenshi. Lesa e entrevista cu Aschwin den e revista cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
