Tur aña dia 8 di maart ta honra e forsa, creatividad y espirito vibrante di e hende muhe. Un dia riba cual tur aña e team di Focus Magazine ta reuni pa celebra den un ambiente inspirativo compartiendo un celebracion significativo pa e ser feminino. Nos tabatin e biaha aki e privilegio pa estrena e prome workshop “Spark and Sip Creative Gathering” di Rexa Bizou na su store espacioso y sofistica situa na Antraco Plaza.
E propietario, Rekha Croes-Daryanani, tabata na entrada pa ricibi cada persona cu su amabilidad y guia nan na e asiento, unda como sorpresa tabatin dos regalo special. Un bunita glas y un canvas personalisa cu un mensahe inspirativo, cual ta un caracteristica di su marca cu a ser funda na 2015. Rekha a expresa su satisfaccion cu finalmente el a logra realisa su soño pa tin su marca den e store diseña na su gusto.
Rekha a haci e workshop cu un toke extra special pa asina Dina Alexander, Swesdy Beeldsnijder, Cristina Tromp, Dalia Semeleer, Carin Correa y Aurora Dijkhoff por a disfruta di un anochi diferente y cu varios wega dibertido mientras tabata sirbi prosecco, refresco of te cu un dushi charcuterie cup y canapés. E workshop dirigi pa Rekha tabata hopi gezellig cu harimento pero tambe hopi informacion interesante cu e team di experto a comparti. E ultimo parti pa cera e celebracion tabata pa crea un armband cu escogencia for di un bunita coleccion di cralchi, cu un variacion grandi di diseño y color. Aunke e tempo a sinti di pasa mucho lihe e team di Focus a keda ainda cu e gana pa sigui combersa riba e temanan cu a keda comparti durante e anochi. Na momento di despedi a keda palabra pa concretisa algo interesante conhuntamente.
