Prome cu a wordo corona como Miss Supranational Curaçao ya caba Veronica Pichardo tabata den spotlight como un artista destaca. E mas impactante te cu awor tabata ora nan a toca su cancion cu Tiësto na Tomorrowland. Veronica ta sinti cu esey ta e momento di mas grandi di su carera. Un sentimento di gran orguyo di ta un yiu di Corsou cu a haya un oportunidad asina grandi pa representa talento di su isla. Veronica Pichardo ademas di su carera artistico ta hurista terminando su master’s degree den derecho priva, negoshante y Miss Supranational Curaçao 2026, cu lo competi 31 juli na Polonia.
Veronica cu su 25 aña di edad ta kere cu cada un faceta di su bida a prepar’e pa su rol actual como miss. E ta haci’e un persona di diferente habilidad pa e por haci e trabou di empodera otronan na un otro manera. E mundo di beyesa ta p’e no solamente loke e ta presenta fisicamente, pero tambe inteligencia y perspectiva di bida cu ta hopi importante. Ta riba un escenario internacional como miss tabata sigur un di su soñonan y ta kere cu el a haya e chens di representa su isla na un manera solido. E ta un responsabilidad grandi cu e ta carga cu hopi determinacion y dedicacion.
Veronica a descubri su pasion pa canto for di su 9 aña di edad. Su tata semper tabatin un studio di musica na cas y el a crece den e mundo di musica door cu su tata ta guitarista y artista. El a siña Veronica hopi for di chikito y e ta hopi gradici di tabatin e oportunidad di haya su pasion durante su infancia. Lesa mas di Veronica Pichardo den Focus Digital Magazine di april di su trayecto como Miss Supranational Curaçao 2026. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
