Su trayecto no a keda sin reto, pero precisamente e desafionan ey a forma Deyanira Zúñiga su historia personal. E momento cu tur cos a cambia tabata ora el a realisa cu e tin un vision mas grandi cu solamente traha. El a sinti e deseo profundo pa crea no solamente evento, pero experiencianan inolvidabel cu ta toca hende. E vision ey a bira e base di loke awe ta WED Aruba. Como hende muhe y mama el a siña pa ta fuerte, pa no rindi y pa sigui kere den su mes aunke tin incertidumbre.
Tur paso a contribui na e disciplina, resiliencia y amor cu Deyanira tin pa su mes, su yiu Olivier André Zúñiga di 10 aña y pa su negoshi. Un di e lesnan mas grandi cu el a siña na comienso tabata pa siña delega. No ta necesario pa haci tur cos bo mes. Crecemento ta bini ora bo ta habri pa apoyo y colaboracion. Deyanira a siña cu pone limite ta necesario pa crece. Siña di bisa no ora cu mester y lo mas importante ta pa proteha su tempo, su energia y su prioridadnan. Deyanira cu tur siguridad ta expresa: “Si mi no ta bon, ni mi famia ni mi negoshi lo beneficia”.
Pa Deyanira e balans entre trabou y famia no ta perfeccion sino presencia. Ora e ta cu su yiu, e ta realmente presente. Ora e ta traha, e ta duna su 100%. E ta recorda su mes constantemente cu tur esaki ta pa construi un futuro miho pa nan dos. Deyanira Zúñiga ta hunto cu su yiu Olivier den Focus Digital Magazine di mei y ta comparti e momentonan mas special di nan hunto, alabes di su siguiente capitulo tanto personalmente como profesionalmente. E revista ta accesibel via Apple Store, Android Google PlayStore y www.focus.aw (Menu Tab FOCUS DIGITAL)
