Un outfit preto, blanco y cora ta un escogencia elegante y impactante. Ta p’esey e pelicula “The Devil Wears Prada” a opta tambe pa e colornan aki. E combinacion di color ta crea un balans fuerte entre simpel y poderoso. Preto y blanco ta forma e base, mientras cu cora ta provee un accento extra cu ta destaca mesora. Hopi hende por ehempel ta scoge carson preto, un camisa blanco y un jas of asesorionan cora. E combinacion aki ta transmiti confiansa, elegancia y un estilo moderno.
“Napoleon Jacket”
E “Napoleon jacket” ta un jas inspira pa e vestuario di Napoleon Bonaparte. E jas tin hopi biaha dos fila di boton y un corte fit elegante. Den pasado e tipo di jas aki tabata wordo bisti pa solda y officier. Awor e ta principalmente un pieza di moda cu ta mustra stylish. Hopi hende ta consider’é un jas chic y cu caracter.
“Blowout”
Un blowout ta un tecnica di styling popular den cua cabey krul of frizzy ta wordo gestraight den un estilo voluminoso y cu golf uzando un föhn y borstel. E resultado ta un look bunita y completo cu ta mustra e largura natural di e cabey sin perde completamente e textura. Awor e ta un tendencia grandi y krulnan no ta importante mas. E bentaha ta cu bo no mester aplica asina hopi producto den bo cabey mas.
Sea bo ta mesclando color, textura, kibrando reglanan of descubriendo bo silueta caracteristico, corda cu moda no ta tocante di sigui tur tendencia, pero pa sa di bisti cu proposito y biba bunita. Den Focus Digital Magazine e fashionista, Swesdy Beeldsnijder, ta trece den su segmento mensual “InStyle” loke ta resalta riba e escenario di moda globalmente. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
