Diaranson atardi durante e conferencia di prensa na SETAR Conexion Center a anuncia e torneo di Copa Gubernamental 2026. Un torneo di softball unda cu diferente departamento gubernamental, companianan estatal y institutonan ta participa.
E torneo e aña aki ta wordo organisa pa SETAR Softball Team conhuntamente cu Pevesa. E torneo ta tuma luga na veld di Kudawecha, cuminsando diaranson 17 di juni 2026 cu e prome partido.
Durante 11 dia, 15 team lo participa pa wak ken ta bay cu e titulo maximo di Campeon di Copa Gubernamental 2026. Ademas, e aña aki tambe lo tin participacion di 3 team di damas, di cual un di nan lo titula Campeon di Copa Gobernamental Damas 2026.
Diabierna 19 di juni 2026, lo tin e apertura oficial hunto cu tur team. Nos ta invita e comunidad di Aruba y fanaticonan pa pasa veld di Kudwecha pa apoya bo team faborito y disfruta di e dushi ambiente deportivo, cu un bar y cushina bon surti.
E aña aki lo tin entretenimento pa Zeta Band, Shine Music y ta clausura e torneo diasabra 27 di juni 2026 hunto cu Tsunami. Sin lubida, pa nos fanaticonan di voetbal lo tin screennan disponibel cu weganan di e Copa Mundial 2026.
Bishita e pagina di Facebook di Copa Gubernamental 2026 pa mas informacion y keda pendiente pa e schedule di e torneo.
