Eliza Lejuez nunca a pensa cu e lo por a converti su pasion di mas grandi den su profesion. Ora el a scoge pa studia na Art School, e tabata pensa cu lo ta dificil pa haya un trabou den mundo di arte. Sinembargo afortunadamente tur cos a resulta hopi bon, cu awendia e por bisa cu e ta bibando di loke e ta haci cu pasion cada dia. Pa Elisa no tin diferencia si e ta traha riba un canvas, un bisti of un tapijt; semper ta trata di e mesun expresion creativo. Su amor pa colornan fuerte y formanan grafico ta visibel den tur loke e crea.
Como artista e circulonan ta hunga un rol importante den su creacionnan. Nan ta simbolisa union, balans y harmonia. E formanan ey ta bolbe semper den su pintura, moda, wallpaper y awor tambe den su diseñonan di interior. Elisa a inspira e diseño di e tapijtnan cu el a lansa recientemente den naturalesa di Aruba, su experiencia den diseño textiel y su amor pa e formanan geometrico. Igualmente su trayecto como artista y diseñador textiel ta influencia tur patronchi y composicion cu por mira den e tehido di e diseño.
Eliza Lejuez den e ultimo añanan a pasa den un gran desaroyo creativo. Banda di pintura, tabata hopi tempo ocupa cu moda y joyeria. Awor el a amplia su creatividad cu diseño di interior, wallpaper, tapijt y pronto tambe esculturanan tridimensional. E ta haya hopi inspiracion den duna bida na su lenguahe visual den diferente disciplina creativo. Loke e kier transmiti na su clientenan ta principalmente un sentimento di felicidad, energia y positivismo: “The One Happy Island Feeling”. Esaki ta e hilo cora cu ta core door di tur su diseñonan.
Den Focus Digital Magazine di juli, Eliza Lejuez ta comparti loke a inspira su ultimo coleccion di paña y con su pinturanan ta influencia e silueta, color of patronchi den e bistinan. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
