EDGAR KOCK: “MISS TEEN UNIVERSE ARUBA TA E COMIENSO DI UN ERA NOBO”

E ta un honor inmenso y un privilegio extraordinario pa Edgar Kock como e fundado di MISS Foundation – Models of Inspiration, Strenghth and Success Foundation –  CEO y Presidente di Miss Teen Universe Aruba. E responsabilidad aki ta representa e comienso di un era nobo y un paso importante den su mision pa guia, inspira y empodera e siguiente generacion di hobennan di Aruba. Edgar ta un creyente firme den Dios y den destino, cu tur oportunidad cu bin den nos caminda tin un proposito. El a acepta e reto aki cu entustisamo pa asina sigui brinda sosten, guia y apoyo na tur hoben cu tin e deseo y potencial pa siña, crece y desaroya nan talento den e mundo di beyesa y moda.

Edgar su vision ta pa posiciona MISS Foundation como e organisacion lider na Aruba y den region Caribe den desaroyo hubenil y liderazgo femenino. Nan kier converti Miss Teen Universe Aruba den un plataforma di referencia, cu ta forma hobennan cu caracter, disciplina y vision global. Nan mision ta desaroya y empodera e hobennan pa medio di un programa academico cu ta bay mucho mas aya di beyesa, preservando nan balornan y identidad. Un di nan metanan principal ta establece Miss Teen Universe Aruba Headquarters & Leadership Academy como un centro permanente di preparacion y liderazgo.

E publico por spera den e proximo edicion di Miss Teen Universe Aruba un competencia di nivel halto. E candidatanan lo ricibi preparacion profesional di un team amplio bou guia di MISS Foundation, cubriendo areanan manera personal styling, fotografia, pasarela, actitud, escenografia, produccion, etiquette & protocol, public speaking, preparacion pa entrevista, oratoria, preparacion mental. Seminarionan manera cuido bucal, cutis, nutricion y hopi otro tema interesante. Tur esaki cu e obhetivo pa cada candidata por presenta su miho version riba scenario.

E Presidente di MISS Foundation ta enfatisa cu e cualidadnan cu un Miss Teen Universe Aruba mester tin pa destaca awendia ta mucho mas cu solamente beyesa fisico. E mester tin integridad, disciplina, humildad, respet y un deseo sincero pa siña y crece. E mester tin tambe bon comunicacion, liderazgo, siguridad den su mes y e capacidad pa inspira otro hobennan cu su ehempel. Miss Teen Universe Aruba ta e maximo embahadora hubenil di su pais; p’esey e mester representa Aruba cu orguyo, elegancia, profesionalismo y semper keda fiel na su balornan y identidad, pasobra e berdadero beyesa ta cuminsa di paden.

E organisacion ta comprometi cu e crecemento personal di cada participante. Esaki lo wordo logra door di educacion continuo, desaroyo personal, entrenamento mental y brindando nan tur e hermentnan necesario pa nan crece tanto como persona, profesional y lider den sociedad. Nan kier pa cada participante bira un ehempel positivo pa otro hobennan.  P’esey e mensahe principal di MISS Foundation ta pa anima tur hoben pa semper kere den nan mes, sigui traha pa bira un miho version di nan mes cada dia y pa nunca lubida nan origen, norma y balornan, pasobra precisamente esaki ta nan mayor fortalesa. Nunca laga niun hende kibra bo soño y metanan. Corda semper cu ora un porta sera, Dios tin mil bentana cu por habri.

E reto di mas grandi pa Edgar Kock ta logra cu tur proceso cana cu organisacion, fluidez y excelencia, mirando cu esaki ta e prome edicion di Miss Teen Universe Aruba. Un proyecto di e magnitud aki solamente por logra cu un board dedica, cu experencia, compromiso y pasion pa haci e soñonan di e hobennan realidad. P’esey nan tin boardmembers califica manera Edselyn Figaroa, Sharissa Kamperveen, Xavier Maduro, Jeanissa Maduro, Darcia Vasquez, Suhaila Alders, Jarehd Pietersz, Zuleyka Willems, Lilly Rodgers y mas miembronan cu kier keda anonimo.

“Un reto importante ta crea confiansa den patrocinado- y colaboradonan pa nan kere den e vision di e proyecto y sigui crece cu nos”

E proceso di preparacion cu ta entusiasma y yena Edgar di emocon ta sin duda e momento di mira e transformacion di cada hoben durante ful nan preparacion. Wak con nan ta florece, gana siguridad, desaroya nan talento y crece como persona ta algo indescribibel. E deseo sincero cu cada un tin pa sobresali y sigui siña ta e motivacion mas grandi pa su persona. E expresion di Edgar di un momento di su trayecto te awor cu a lag’e sinti orguyoso di e capitulo nobo aki: “Esey ta ora mi mira e ex-participantenan cu mi a guia den pasado y wak con exitoso nan a bira den nan bida personal y profesional. Ta un satisfaccion enorme pa sa cu mi a contribui na nan crecemento. Ademas, apesar di obstaculonan y momento den cual hendenan a intenta cera portanan pa mi y e participantenan, Dios semper a habri portanan nobo pa mi. Awe mi por mira e fruto di perserverancia mientras nos ta prepara pa e prome edicion oficial di Miss Teen Universe Aruba 2026, un marca mucho mas poderoso y grandi, un proyecto cu un futuro prometedor”.

Edgard Kock ta mira den e proximo cinco añanan cu Miss Teen Universe Aruba como e certamen hubenil mas prestigioso y reconoci na Aruba. E ta spera cu MISS Foundation a logra establece oficialmente Miss Teen Universe Aruba Headquarters & Leadership Academy, y sigui fortaleciendo su programa academico. Su mayor deseo ta forma un generacion di hobennan lider cu ta destaca den nan estudio, carera profesional, comunidad y escenario internacional. Pa Edgar e berdadero exito no ta midi solamente coronanan, sino den e impacto positivo cu cada participante laga den sociedad.