E combinacion di creatividad, strategia y impacto den un solo proyecto ta locual a atrae Candy Reino pa forma parti di Doral Fashion Week y NY Fashion Week. Nan ta comparti e mesun vision pa duna talento nobo visibilidad y oportunidad real. Creando un brug entre creatividad y mercadonan internacional, aspectonan cu ta haci e colaboracion sin duda hopi valioso. Ta un paso importante den su carera, pasobra e por yuda diseñadornan, modelonan y empresarionan proyecta nan identidad riba un nivel internacional.
E aña aki Candy ta cumpli 4 aña bibando na Boneiro, cual a representa un periodo di crecemento, adaptacion y hopi oportunidad. El a logra conecta cu e comunidad creativo, comparti su experiencia den ‘branding y marketing digital’ y contribui na desaroyo di talentonan local. Ta un isla cu a habri porta p’e pa colaboracionnan nobo y cu a permit’e sigui expande su vision internacional. Su meta ta pa transforma marcanan, duna impulso na liderazgo creativo y crea impacto tanto den negoshi como den bida di hende.
Candy Reino su pasion pa ‘branding’, moda y desaroyo di talento a habri e caminda pa ta envolvi cu Doral Fashion Week y New York Fashion Week, pero tambe door di traha cu Aruba Fashion Week a dun’e oportunidad aki. Mester agrega sigur tambe su experiencia den posicionamento di marca y su trabou cu creativonan. Candy ta splica den Focus Digital Magazine di juli con por sigura cu un marca ta destaca den un paisahe di moda satura. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
