Sin nos pone atencion hopi di nos ideanan riba e tema di sensualidad no a nace for di nos mes. Nan a wordo forma door di loke nos a mira y scucha durante hopi aña.
Talbes Hollywood a siña bo cu un muhe sexy semper mester ta perfecto.
Talbes Instagram a convence bo cu sensualidad ta midi den filter, pose y aprobacion di otro hende.
Talbes pornografia a presenta intimidad como un “performance” na luga di un conexion.
Talbes bo prome amor a laga bo kere cu bo balor depende di con bo ta mustra of con bo por satisface otro.
Hollywood? Instagram? Pornografia? Bo prome amor?… Of bo mesun curpa a papia cu bo?
Ora bo tende e palabra “sexy” kico ta bin den bo mente?
Un shimis cortico?
Un curpa perfecto?
Un mirada iresistibel?
Of un cantidad di “likes” riba social media?
Den su segmento di e luna di augustus, Dina Alexander ta haci un pregunta diferente…
Bo propio curpa algun biaha a haya e oportunidad pa bisa bo kico ta sexy realmente?
Paso tin un gran diferencia entre mustra sexy y sinti sensual.
Mustra sexy ta algo cu bo por fabrica.
Sensualidad ta algo cu bo ta biba.
Sensualidad no ta cuminsa den bo cashi paña.
E no ta cuminsa cu makeup.
E no ta cuminsa cu un filter.
E ta cuminsa e momento cu bo curpa ta sinti sigur pa ta simplemente… abo.
Un muhe cu ta biba den conexion cu su curpa ta move diferente.
E ta cana cu mas confiansa.
E ta papia cu mas calma.
E no mester grita pa wordo scucha.
Su presencia ta basta.
Curiosamente, e muhenan cu hopi biaha ta laga mas impresion no ta semper esunnan cu ta busca mas atencion. Kico ta locual nan sa? Lesa mas den Focus Digital Magazine cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
