E vakantie aki Maria-Elena Croes a bishita Medellin, Hulanda, Ibiza, Amalfi Coast y Gent. Despues di e biahe aki, Juffrouw Maya ta inicia un aña escolar inspira y motiva. E ta docente di klas 5 na Colegio Santa Famia y ta celebra e aña aki 15 aniversario den enseñanza. El a mira hopi cambio den educacion y den e manera cu e muchanan ta siña. Loke mas e gusta ta incorpora tecnologia y recurso digital den klas. Esaki ta haci e lesnan mas visual, interactivo y conecta cu e mundo di e muchanan. Pa Juf Maya cada aña escolar ta un oportunidad pa crece hunto cu su alumnonan y pa sigui desaroya su mes como docente.
E momentonan durante su vakantie na Europa cu a impresion’e mas tabata para riba un trapi na Amalfi Coast, Italia, ta wak e paisahe su dilanti. E momento a haci Maria-Elena “Maya” Croes reflexiona y realmente aprecia unda e tabata para. El a sinti hopi agradecido y bendiciona di por tin salud, famia y amistad, pero tambe di tin e oportunidad pa conoce mundo y crea memoria nobo. Na Hulanda el a gusta e infrastructura pa core bais. Esaki a dun’e ainda mas entusiasmo pa e trabou cu e ta haci cu e muchanan rond di verkeersexamen y siguridad den trafico. E kier prepara nan no solamente pa pasa un examen, pero pa bira muchanan cu ta consciente y responsabel ora nan ta den trafico.
E tema cu Juf Maya a scoge pa su klas e aña aki ta “Curason” y e ta pone hopi enfasis riba “How you talk to yourself matters”. E kier siña e muchanan cu e manera cu bo papia cu bo mes ta importante. Nan mester siña bisa: “Mi ta importante, mi ta unico, mi por hacie, mi ta suficiente y mi por siña di mi erornan”. Educacion p’e como maestra no ta solamente trata di resultado academico, pero tambe di forma muchanan pa tin confiansa den nan mes, cu ta conoce nan balor y cu ta siña pa trata nan mes cu positivismo.
Maria-Elena “Maya” Croes den Focus Digital Magazine di September ta conta ademas di su metanan pa e aña escolar aki, tambe di su experiencianan durante su biahe, cu a yud’e hopi pa charge su mes, pasobra el a dedica tempo 100% na dje y su famia. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
