MISS TURISMO MUNDIAL TA ANTICIPA SOLAMENTE CRECEMENTO

E president di GLW Foundation, George Winterdaal, a haya e oportunidad pa hiba Miss Turismo Mundial riba un plataforma internacional. Pa e celebracion di su 10 aniversario e certamen cu desde su inicio a ser organisa na Aruba, a haya como su sede Punta Cana, Republica Dominicana. Na prome instante pa George esaki tabata un desafio door cu no tabata facil pa sali di un luga cu ya caba ta familiarisa cu e logistica y bay na un pais diferente. E meta principal semper ta pa promove e turismo di Aruba, sinembargo George ta bisa: “Nunca bo ta “baas den bo cas”!

Sondeando un luga pa e concurso, e opcion mesora tabata Punta Cana door cu e ta un luga hopi similar cu Aruba. Cu bunita hotel y beach, clima tropical y hendenan amabel. Pa e president di GLW Foundation, e cherry riba e bolo tabata cu e hotel ta un All Inclusive y esaki a haci’e interesante pa e acompañante di e reinanan. E parti logistico tambe a wordo basta alivia door cu no mester a busca transport evitando e coremento di un luga pa otro. Nan no mester sali busca tur dia restaurant pa lunch y dinner ya cu tur cos ta den hotel mes. Hasta e teatro unda e certamen a tuma luga ta den e hotel y un gasto menos pa locual ta e venue. Pues nan a confronta algun desafio, pero tabatin tambe hopi bentaha.

 

E vision di George tras di expansion di e certamen mas aya di Aruba ta pa su crecemento. E ta sinti cu e nomber di e certamen ta asina comercial y ta sigur cu e tin un futuro grandi. Nan a mantene pa 10 aña na un nivel mas limita, pero awor: “The Sky Is The Limit”, y nan ta bay all out pa e siguiente edicionnan. Hibando e certamen su sede na otro pais ta nifica pa e president di GLW Foundation un logro grandi. E tabatin semper e temor pa saca e certamen for di Aruba, pasobra e meta principal ta pa promove e turismo di Aruba. “Sinembargo nunca bo ta “baas den bo cas” y e ayudo cu nos tabata haya di diferente instancia den turismo tabata masha nada mes compara cu tur e promocion cu bo kier duna bo isla”, segun George Winterdaal su palabranan.

GANADORANAN

E president di GLW Foundation ta bisa aworaki e ta anticipa solamente crecemento, ya caba nan a cuminsa haya peticion pa participacion di Nigeria, Italia, Spaña, Chile, Peru y varios pais mas cu ta desea di join e famia di Turismo Mundial. E ta bisa tambe cu nos representantenan tanto Shannon Vullinghs y Gen Ras a haci un tremendo trabou na Republica Dominicana. Den Focus Digital Magazine di september tin hopi bunita potret di tur e actividadnan. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)