“YOU ARE WORTH IT”

E trio di experto di L’Oréal Paris e aña aki cu nan tour na Aruba tabata atrobe den un solo palabra fabuloso. Directamente for di Puerto Rico pa Aruba tabata e embahadornan di e marca: Andrea Nogueras, Aileen Toro y Jason Guasch. Cada uno tin estudio y conocemento riba nan area y ta biaha rond Caribe compartiendo tur locual e marca renombra mundialmente aki ta brinda pa embeyese y empodera e ser femenino.

Entre e diferente presentacionnan na Aruba nos di Focus tabata invita pa e team di mercadeo di Romar Trading Beauty pa un mainta fantastico, unda e invitadonan presente sea ta traha, bende of uza L’Oréal Paris como consumidor. E evento a inicia cu e prome experto, Andrea Nogueras, cu despues di introduci su mes a haci presentacion di e video: “I’m Worth It” … L’Oréal Paris su slogan pa celebra su mas di 50 aña, enfatisando e importancia di L’Oreal Paris su pasion pa balor propio.

 

E marca di beyesa aki, cu ta lider mundialmente tabata e prome marca na mundo pa enfatisa e importancia di balor propio, un mensahe fuerte cu ta wordo profundisa awendia cu “Lessons of Worth”. E lesnan aki ta un serie di testimonionan poderoso di algun di e boseronan di L’Oreal Paris, cu ta comparti kico e slogan iconico ta nifica pa nan. E ultimo spokesperson cu a uni pa duna su punto di bista riba e slogan iconico aki ta Kendall Jenner.

E skin expert di L’Oréal Paris , Andrea Nogueras, a splica detayadamente riba tur e pasonan cu mester haci pa cuida e cara pa e makiyahe por luci. E siguiente pa trece e linea di cuido pa cabey tabata Aileen Toro, ken ta e hair expert di e marca. Ademas di trece informacion valioso di e linea completo, el a haci tambe algun analisis di e fibra capilar. Pa cera cu un ‘broche di oro’ e makeup artist, Jason Guasch, a presenta e innovacion di makiyahe mas nobo di L’Oréal Paris. El a mustra e tendencianan den makiyahe enfatisando cu tin un mundo di posibilidad den makiyahe.