Mariella van der Linden y su yiu Zia tabata e cover story di edicion di FOCUS mei 2017 unda cu el a comparti ki tabata su luchanan cu su yiu muhe. Despues cu Zia a cumpli 1 aña e dokternan na Hulanda despues di diferente test a duna Mariella e resultado cu su yiu muhe tin ‘Cerebral Palsy’. Mariella den profundidad di su curason semper tabatin e speransa cu e diagnostico por ta otro. Nan a bolbe Aruba y despues di un tempo, Mariella a muda pa Hulanda hunto cu Zia caminda e por ricibi tratamento mas specialisa. Despues su dos yiu hombernan, Christian y Jayvan, a reuni cu nan pa e famia ta hunto.
Mariella ta conta FOCUS cu Zia ainda ta lanta tur mainta feliz, cu un sonrisa riba su cara cu no ta kita durante su dia. Su cuido ta bayendo hopi bon, apesar cu no ta su desabilidad fisico so ta e cuido di mas grandi. Zia tin un banda di wowo cu no ta funciona bon di cual nan ta pendiente pa mas investigacion. Su ultimo test pa mira y midi e actividadnan electrico den su celebro a detecta cu e tin epilepsia. E dokternan ta hopi atento y regularmente nan tin cita di control tanto na hospital como na revalidatiecentrum, pa keda monitor su desaroyo. Zia ta bay therapeutische peutergroep dos bes pa siman parti mainta. E ta den grupo cu mas mucha caminda nan ta haci diferente actividad pa stimula nan desaroyo como tambe haya diferente terapia manera; ergotherapia, fysiotherapia, terapia di musica y logopedia. E ta gusta bai su TPG, e ta siña hopi y traha duro.
Christian y Jayvian a yega Hulanda den Winter y mester a cuminsa scol nobo, crea amigonan nobo caminda nan mester a adapta na pensa y papia hulandes. Ademas di ta leu di famia y amigonan na Aruba cual tur cos hunto tabatin su retonan pa e muchanan. Mariella ta contento cu scol ta bayendo bon, ambos ta bay over pa e siguiente klas, Christian klas 6 (na hulanda groep 8) y Jayvian klas 3 (groep 5). Tur dos ta practica y ta gusta e deporte di baseball.
Mariella su dianan ta dedica na su yiunan. E ta haya falta si di eherce su trabou di maestro di scol pero su yiunan ta bay prome y e cuido intensivo cu Zia mester ta keda importante. “P’esey mi a opta pa cuminsa un estudio ‘kinderpsychologie’ na cas. Mi por eherce riba mi mesun tempo. Cada momento cu mi tin ‘pa mi mes’, ora e muchanan ta na scol of drumi mi ta studia. E ta algo cu mi por combina cu maestra di scol y tambe ta mayor”.
Mariella ta hopi agradecido na Dios y na su mama cu t’ey banda di nan. Danki na su apoyo y yudansa incondicional nan t’ey ainda na Hulanda. Principalmente den e periodo frieu y di yobida e tabata yud’e wak pa Zia mientras e tabata cana bay hiba e muchanan scol, haci extra les cu Christian y Jayvian, cana bay supermarket etc.
Christian ta anhela pa pasa su cumpleaños na Aruba. No ta sigur ainda pero nan ta spera di por logra bay cu vakantie como un recompensa di nan esfuerso na scol y tur e cambionan cu a sosode e ultimo aña aki.
