E Reina di Soul, Aretha Franklin, cu a canta cu su estilo inigualabel canticanan clasico manera “I Say a Little Prayer”, “Think” y su signature song, “Respect”, y cu tabata un icono cultural rond mundo, a fayece na edad di 76 aña di cancer di pancreas avansa.
Aretha Louise Franklin cu a nace 25 di maart 1942 na Memphis, Tennessee, a fayece awe mainta na su cas na Detroit. Segun e famia a informa cu esaki ta un di e momentonan mas scur di nan bida. Cu nan no tin palabra apropia pa expresa e dolor den nan curason. Nan a perde e muhe cu tabata na cabes di e famia y cu a stima su yiu-, nieto-, sobrina-, sobrino-, y primonan sin limite. Aretha Franklin a lucha contra problemanan di salud cu no a ser divulga den e ultimo añanan, y na 2017 el a anuncia su retiro. Un cantante profesional y pianista virtuoso na final di su adolescencia, un superstar den su mid-20s, Aretha Franklin for di hopi tempo a regla cualkier argumento di ken tabata e miho vocalista di su epoca. Su donnan tanto natural como adkeri, su pasion pa gospel y cu e curashi pa canalisa dolor priva den cancionnan di liberacion ta unico. Su disconan a bende miyones di copia y el a gana 18 Grammy Awards. Na 1987, el a bira e prome hende muhe instala den Rock and Roll Hall of Fame. Aretha Franklin tabatin un trayectoria largo di exito y aclama pa miyones di fanaticada rond mundo. E entiero di Aretha Franklin lo ser anuncia den e proximo dianan pa e famia.
