E concierto “Dios Ta Cu Nos” cu Eltienne Yarzargay a presenta den Cas di Cultura, a resulta den un anochi inolvidabel cu un sala sold out y manera cu esaki a ser planea. Un show hopi varia cu a dura alrededor di 3 ora, cu Eltienne presentando e diferente temanan cu durante 10 aña el a skirbi. El a presenta cu e artistanan Sharon Roos y Miguel Genser, cu el a traha cu nan durante e dies añanan. E dos otro cantantenan cu tambe a presenta ta un alumno di Eltienne cu yama Jetzenia y tambe Mayra cu ta un integrante di e banda United Melodies.
Video: Solmaita Yarzagaray
Cada biaha e expectativa pa e concierto ta bira mas grandi y e presentacionnan ta rekeri hopi mas atencion riba e detayenan. Segun Eltienne cu “Dios Ta Cu Nos” ta un di e miho conciertonan cu el a organisa y tabata sumamente exitoso. E highlight di e concierto tabata e cancion nobo “Warrior” den estilo reggae cu Eltienne a presenta cu Noush. Un di cancionnan den un bachi nobo cu el a presenta pa prome biaha cu United Melodies riba escenario tabata “Emmanuel”. Otro cancion hopi special presenta tabata “Yenami” cu ta un cancion di adoracion cu por a sinti cu el ministra na e publico den Cas di Cultura.
Despues di e concierto “Dios Ta Cu Nos” por spera mas di Eltienne y United Melodies den temporada di december cu nan lo bay tin mas presentacion. Un gradicimento ta bay di parti Eltienne Yarzagary na henter e team di United Melodies, Solmaita Yarzagary, su casa y manager, cu tambe a presenta riba escenario y tur hende cu a hinca nan esfuerso pa un anochi hopi bunita,
Fotografia: Ashwin Maduro
