Desde hoben Edalitza Weller ta envolvi den trabou comunitario y tabata miembro di Kiwanis Key Club Colegio Arubano. Despues di a termina Colegio Arubano, Edalitza a continua cu su estudio na Hulanda, juli 2010 el a gradua y ricibi su diploma den International Business, unabes cu el a regresa Aruba, el a cuminsa su carera profesional. E amor pa sigui haci trabou comunitario a keda manera un “burning flame” den Edalitza su curason.
Na mei 2014, despues cu Edalitza a acerca su ‘mother club’, a instal’e como miembro di Kiwanis Club of Aruba. Den Kiwanis Edalitza tabata tin diferente responsabilidad; el a fungi 2 aña como board director, 2 aña chair PR & Branding, 1 aña como vice presidente di e club. Pa dos termino consecutivo Edalitza a fungi como Division 26 PR & Branding pa e 14 clubnan di Kiwanis den 6 pais den Caribe. Banda di esey, e tabatin e oportunidad di duna seminario relaciona cu ‘branding’ y a atende diferente convencion internacional, representando su club. Desde 1 di october 2018 Edalitza ta sirbi humildemente como presidente di Kiwanis Club of Aruba. Edalitza ta un dama cu un fe hopi grandi den Papa Dios, ta energetico, humilde, timido, positivo y semper cla pa yuda cu un sonrisa grandi riba su cara.
Key Club tabatin un impacto positivo den su bida. El a siña asina hopi manera; liderazgo, con pa traha den ekipo, organisa e proyecto- y eventonan pa recauda fondo y e importancia pa duna bek y contribui cu e comunidad. Su conseho ta pa cada Key Clubber disfruta di e momentonan asina educativo y experencia unico, cu lo forma bo como ser humano y den futuro den bo carera profesional. Despues bo por comparti bo experencia y experticio cu nos futuro generacion. Locual cu ta yena Edalitza cu hopi satisfaccion ta pa wak un sonrisa riba cara di un mucha.
