Den FOCUS di e luna aki e profeta Shariff Eddine ta splica cu e palabra profeta mes ta nifica; pa ta un vocero di un persona. Un profeta ta representa y papia na fabor di e persona cu ta mand’e, pa e bisa locual e persona cu a mand’e kier p’e bisa, cu e curason di e persona. Un di e tareanan di un profeta ta, pa prepara e pueblo di Dios pa e trabou di ministerio/sirbi cu Dios a yama nan pa haci. Esey ta skirbi den Efesionan 4:11-12.
Otro tarea di un profeta ta comunica e curason y intencion di esun cu a mand’e. E profetanan ta conoci pa confronta e lidernan, e gobiernonan y e individualnan, ora nan ta biba contrario na e boluntad di Dios. Ta comunica na nan, pa haci locual Dios kier pa nan haci, door di bisa nan kico Dios ta bisando na e momento ey. Shariff por sinti basta emocion mientras e ta profetisando, door cu e ta comunica e curason di Dios. For di chikito el a lanta den un cas Cristian y tabata bay iglesia. Entre 7-14 aña di edad nan a stop di bay iglesia, pero el a bin bek cerca Dios cu su 14 aña di edad. Cu 15 aña Dios a papia cu Shariff y yam’e pa ta Su vocero y cu 16 aña el a cuminsa predica. Ya cu su 18 aña el a cuminsa biaha internacionalmente pa predica. Sigur un entrevista cu no por keda sin lesa den edicion di januari unda profeta Shariff Eddine ta declara cu den 2019 ta e tempo pa e cosnan cu tabata tapa y scondi, sali na luz.
