GRANDIOSO FIESTA PA MAX AUSTIN

Den FOCUS di december Thalia Croes tabata hunto Max Austin Lopez Catari den e reportahe di Baby Pampers 2018. E aña a inicia cu alegria pa henter e famia cu e celebracion grandioso den Renaissance Convention Center di e prome aña di Max dia 20 di januari. E preparativonan pa e fiesta a cuminsa for di ora Max tabatin 4 luna, buscando diferente tema y idea riba pinterest y na final a scoge e tema di Baseball.

Thalia a traha un lista di tur cos cu nan mester y di eynan nan a start cu e preparativonan. Su mama ta encanta traha decoracion pa fiesta, pues el a cuminsa di trempan cu esaki. Pa December ya nan tabatin practicamente casi tur cos paga y tur detaye cumpra. E motibo dicon nan a scoge e tema di Baseball ta debi cu den e famia nan ta fanatico di baseball. Specialmente e tata di Max, Jhon Gerardo Lopez Catari, cu tabata hungador di baseball, Thalia su tata tambe tabata hunga baseball y su suegro tabata coach di baseball. Den cas nan tin yen di bala di baseball cual por cierto Max ta gusta hunga cu nan masha hopi. Thalia y Jhon tabata desea pa tur hende por a disfruta e fiesta hunto cu Max y tambe pa e muchanan pasa dushi. 

E invitadonan a yega cu cara contento y cla pa fiesta unda nan a ser bon atendi pa e staff di Convention Center. Cu un programa bon prepara cu a inicia cu e prome ora cu treat di cotton candy y popcorn pa despues pasa pa e dino jump pa entretene e muchanan. Despues por a disfruta di un tremendo entretenimento di Kerekentenchi Party Xplosion. Na final mane ta e tradicion di e famia, un di e omonan di Thalia a toca guitara y canta ‘happy birthday’. Esaki tabata un momento super special pa Max caminda tur famia y sernan keri a bin hunto pa su cumpleaños.

Thalia Gabriela Croes cu ta un ex-Miss ta enjoy su etapa como mama y loke el a comparti cu FOCUS ta el a siña hopi: “E ta increibel con un baby por cambia bo bida di un dia pa otro. Danki na Max mi a siña planea miho, con pa traha cu ora y tambe pa comunica bon cu esunnan cu ta keda cuida Max pa mi. E parti mas dushi ta wak con bo baby ta desaroya, cada biaha e ta haci algo nobo, e ta increibel con lihe un baby ta siña”.

Bo ta full ‘time mom’?

Mi ta un ‘part time mom & part time UA student’. Mi pareha y nos famia ta yuda mi hopi pa cuida Max. Na prome instante mi a pensa cu mi no lo por “manage” Universidad y baby, sinembargo mi a demostra mi mes cu tur cos cu bo propone bo por alcansa den bida. E ta duro pero no imposibel. E mas importante ta cu nos semper ta zorg pa dune tur e amor y cariño cu e merece ora nos pasa tempo cu ne.

Ki Max gusta come?

Max ta encanta un sopi di berdura y mayoria biaha e sopi di galiña di su bisawela. Tambe e gusta come batata machica cu spinashi y den weekend su arepa cu manteca cu su wela ta haci pe.

Boso tin un plan special pa 2019?

E aña aki mi lo kier pasa mas tempo posibel cu Max den famia, ya cu e ta creciendo asina lihe. Aparte di esey mi kier focus riba mi estudio y trata di sigui cu un estilo di bida saludabel.