Karl Lagerfeld, e director creativo di Chanel, a fayece awe na edad di 85 aña despues di algun siman den mal estado di salud. For di momento cu e no a asisti na e ‘haute couture’ show di Chanel na Paris, esaki a crea cierto preocupacion caba cerca su amistad y personanan envolvi den e mundo di moda.
E diseñador di moda a ser hiba cu urgencia na Hôpital Américain de Paris dialuna anochi, y el a fayece awe mainta. E tabata na cabes di e cas di moda Chanel desde 1983. E diseñador cu segun ta pensa cu a traha te na su morto, incluso dirigiendo y pasa informacion na su team pa e coleccion Fendi herfst/winter 2019, cu mester ser presenta na Milan Fashion Week e siman aki.
Procedente di Hamburg (Alemania) y cu ascendencia sueco, Karl Lagerfeld a nace den seno di un famia financieramente bon na aña 1933, segun prensa Aleman ta señala for di su geboortebewijs, aunke e diseñador mes a prefera di restrasa su fecha pa 1938. Siendo adolescente, su spirito emprendedor y su gana di progresa a pone bandona su pais pa establece na Paris, unda el a atende scol secundaro Lycée Montaigne. Un decision cu tabata su prome paso pa ser seduci pa e mundo di moda.
El a gana e concurso International Wool Secretariat na 1955 y 3 aña despues el a ser contrata pa Jean Patou, unda el a traha den e coleccionnan di Alta Costura. Durante e añanan 60, el a realisa su prome colaboracionnan cu e cas Chloé, un cas significativo den su trayectoria profesional, unda el a bolbe na 1992 pa ser e director creativo durante 5 aña. Sin embargo, ta su posicion como esun na cabes di e firma Fendi desde 1965 y di Chanel desde 1983, cu a consolida su fama internacional. Karl Lagerfeld a comberti den un Fashion Icon cu a seduci for di estreyanan di e mundo di espectaculo te na e miembronan di realesa, manera Carolina di Monaco, su gran amiga y cu a sigui su trayectoria fielmente. Karl Lagerfeld semper bisti cu su brilnan di solo na su cara ta laga su legacia den e mundo di moda internacional.
