Revista FOCUS a haci entrega di RECONOCIMENTO 2018 durante un anochi elegante y ameno na House of Mosaic. Conoci como un revista di excelencia cu pa 24 aña consecutivo, a sa di destaca nos hendenan di un forma excepcional, kendenan por ta un ehempel y inspiracion pa hopi otro persona. Cada persona reconoci a ricibi un obra di e escultora Maritza Erasmus, cu conhuntamente cu Fernando Vermeer a crea un pieza original.
Maritza Erasmus a inspira e obra riba nos dushi isla Aruba, p’esey mes el a uza nos bunita santo blanco cu textura ‘rough’ pa refleha nos baranca y e piedranan di coral. Y e color blauw ta pa nos lama na costa panort di Aruba. Memey di e obra el a pone central e potret unda ta destaca tanto e persona cu a ricibi e reconocimento como revista FOCUS. Esaki ta flota riba e fondo creando un efecto 3 dimensional. E award ta riba un pedestal como un base fuerte y stabiel, pa destaca e persona reconoci como un trofeo cotisa.
E prome persona cu a ricibi su Reconocimento diaranson anochi tabata Dokter Louise Rafael-Croes como FOCUS RECONOCIMENTO SPECIAL. Minister Andin Bikker a haci e entrega di e reconocimento na dokter Rafael-Croes, cu desde di 1997 cu el a finalisa su estudio como pediatra na Hulanda, el bin traha na Aruba unda el a atende un sinfín di mucha, cu awendia ta adultonan cu ta recorde cu un cariño special. Dokter Rafael-Croes ta un persona cu semper a vocifera su deseo pa nos tin un Aruba saludabel, feliz, sin abuso di mucha y sin violencia domestico.
Esaki ta e segundo aña cu FOCUS conhuntamente cu PANTENE, a eligi via FACEBOOK Inspiracion 2018. E reaccion atrobe tabata asina grandi cu FOCUS conhuntamente cu PANTENE a dicidi pa scoge dos persona pa nan storia cu a impacta y inspira den 2018. E dos personanan cu a ricibi e RECONOCIMENTO FOCUS PANTENE INSPIRACION tabata Gwendolyn Kock y Karena Maduro.
Gwendolin Kock –Croes, miho conoci pa ‘Wendy’ a landa riba diadomingo 11 di november 2018, for di e bahía Tomate na Venezuela, den 10 ora y 2 minuut yega Aruba. Wendy ta hopi contento cu otro persona a pon’e den nominacion pa loke el a haci cu “Crossing For Hope”. E tabata hopi emocional pa Wendy, paso ta prome biaha un hende muher ta logra landa di Venezuela pa Aruba. Wendy a ricibi su reconocimento for di Ana Maria Ramirez, ehecutivo di mercadeo di Compra Ltd.
Karena Maduro despues di un photoshooting pa un amiga cu t-shirts di “inspirational quotes” pa curvy ladies, e idea a nace pa Karena traha un closed group, pa nan por comparti tur loke nan ta haya pa inspira otro muher plus size. Awe e grupo ta consisti di mas di 2600 hende muhe y for di grupo aki a nace Viva Voluptuous Aruba Models. Karena a yena di hopi emocion ora el a lesa e ‘post’ di e personanan cu a nomin’e pa e Reconocimento Focus Pantene Inspiracion 2018. Karena a ricibi su reconocimento for di e artista Elvis Lopez, cu e asistencia di Miss Teen Earth, Shanty Kanhai, cu tabata riba e portada di december 2018.
Tur aña revista FOCUS ta duna reconocemento na un dama cu a destaca den su totalidad tanto den su trayectoria profesional como personal. E RECONOCIMENTO PERSONAHE FOCUS 2018 a bay pa Sharon Fränkel-de Cuba. E no tabata presente pa ricibi su reconocimento pa motibo di un biahe di trabou, pero Sharon a graba un mensahe cu el a comparti cu tur persona presente. E otro dos personanan cu no tabata presente pa motibonan fuera di nan alcance, tabata Ronchi de Cuba y Odo Frangie, ambos a ricibi un reconocimento den categoria di moda.
E evento di FOCUS conhuntamente cu House of Mosaic, a haci oficialmente e presentacion di e proyecto mas nobo di Fernando Mansur, cu ta su Villa Rental cual ta den proceso pa converti den un boutique hotel, cu tur e elegancia cu ta caracterisa su propietario. Fernando cu a yega di forma parti di e team di e revista, a hiba un discurso interesante ilustrando e balor di un revista awendia. Cu por considera FOCUS como un producto di luho, pa e echo cu por tin’e imprimi pa semper mientras locual cu ta digital por desaparece un dia.
E aña aki atrobe a fungi como e maestra di ceremonia Edalitza Weller, cu a luci un outfit, diseño di Gigliola Gomez. E directora di FOCUS tambe a luci un creacion esplendido di Gigliola Designs. E invitadonan tanto e cabayero- como e damanan a mustra nan estilo unico, y e damanan a ricibi tips y e productonan di e linea nobo di Pantene pa nan uza y pa despues duna nan review di e marca. E anochi aki tabatin sigur un excelente bar cu e bebidanan di Pepia Est y Divino. E ‘mixologist’, Kevin Kock, a mix un Disarrono Sour Cocktail cu a cay ful na smak durante e cocktail party den e hardin di House of Mosaic. E invitadonan disfruta di un seleccion exkisito di hors d’oeuvres di Aruba Wine & Dine.Un gradicimento special ta bay na e ekipo di ELITE, cu ta un patrocinador conhuntamente cu House of Mosaic di e entrega di Reconocimento di revista FOCUS.
