E siguidornan di certamen di beyesa na Aruba a haya un grato sorpresa momento cu Hendrik “Endy” Croes a share un post di Miss Aruba Pageant. Esaki tabata den oranan di merdia riba Bierna Santo, cu el a post lo siguiente; “Cu hopi honor mi ta comparti cu boso cu mi a wordo apunta como Director di Miss Aruba pa aña 2018”.
Desde aña pasa caba na december Miss Aruba Pageant a anticipa via nan facebook page cu nan ta sperando e temporada di Miss Aruba 2018, cu gran expectativa y un aña cu lo bay tin hopi desafio y innovacion.
Mientras cu Endy Croes den un entrevista cu FOCUS den edicion di maart 2017, a elabora ampliamente riba su punto di bista tocante e certamen di Miss Aruba.
Revista FOCUS a tuma contacto cu Endy Croes y el a splica cu e proceso pa e bira director di Star Promotion Foundation, a cuminsa algun aña atras caba. E tabata ricibi e guia necesario for di Star Promotion Foundation (SPF) pa por dirigi e certamen un dia. E aña aki e oportunidad a yega, y e ta sinti’e cla, motiva y ansioso pa trece mas di su propio vision y filosofia riba loke Aruba su maximo embahadoranan di beyesa mester representa. E ta hopi agradecido na SPF cu a deposita e confiansa den su persona.
Den edicion di FOCUS di maart aña pasa, bo a elabora riba diferente punto cu awor ta ser anuncia como cambio adicional…
Un di e cambionan principal ta e plan di desaroyo cu kier introduci pa tur esnan cu kier forma parti di Miss Aruba. Lo pone hopi enfasis riba e lema: Inspire, Educate, Empower. Candidatanan lo ricibi un plan personalisa pa traha riba e puntonan cu un comision di experto di beyesa ta mira cu nan mester traha riba nan, p’asina nan por ta den e miho condicion posibel pa representa Aruba na un di e certamennan internacional. Inscripcion no ta mara na 1 aña so mas, sino e ta mara na e nivel di desaroyo di cada candidata.
E aspecto financiero pa preparacion di e candidatanan, bo tin un plan caba pa atende cu esaki?
Sigur cu si! Mi no ta kere cu placa ta tur cos, mi ta kere cu nos mester haci miho uzo di tur ayudo cu nos por ricibi. Aruba tin hopi persona talentoso cu ta willing pa traha hunto na bienestar di nos isla. Nos mester djis traha un strategia cu lo beneficia nos tur. Mi ta convenci cu Aruba kier un Miss Universe y un Miss World, dus nos tin cu traha como 1 solo isla pa logra esey. Nos lo ta en busca di partnernan strategico cu lo yuda nos riba tur area di e certamen, incluyendo e aspecto financiero.
Dos Embahadora di Beyesa cu a ricibi e preparacion di Endy Croes
Bo tin e team forma caba? Y ki e criteria pa ta den bo team?
E vision ta cla, awo ta bay en busca di esnan cu kier forma parti di e vision y mentalidad nobo. E vision ta pa traha den union, y no separa mas. No ta 1 preparador di reina so lo traha, pero e idea ta pa tur traha hunto. E ekipo mester ta forma di expertonan riba cada aspecto cu nos representantenan mester prepara riba nan. Y cada un cu ta forma parti di e ekipo mester ta habri tambe pa sigui siña y desaroya nan mes. E compromiso cu e ekipo mester ta di largo duracion. Un ekipo solido cu lo keda crece y mehora cu cada participacion.
Dos persona cu sin duda lo ta den e team hunto cu Endy
Con bo ta sinti bo cu e reto nobo aki den e mundo di beyesa?
Mi ta ansioso, honra y cla pa traha! Mi kier traha cu un ekipo motiva cu tambe ta kere den e vision fresco y nobo, dunando contenido na e titulonan mas importante pa nos isla. Mi ta desea pa e titulo di Miss Aruba haya e prestigio y balor cu e merece. Nos ta bay traha duro pa nos Miss Aruba ta un rolemodel pa mucha-, hoben- y adultonan local y internacional.
